वाघोली (पुणे) येथे अल्पवयीन मुलीवर लग्नाचे आमीष दाखवून बलात्कार !

पुणे – वाघोली येथील अल्पवयीन मुलीवर दोघांनी लैंगिक अत्याचार केल्यामुळे ती गर्भवती राहिल्याची घटना समोर आली. मुलीवर अत्याचार होऊनही पीडितेच्या आईने अत्याचार करणार्‍याची साथ दिल्याने आईसह तिघांवर ‘पोक्सो’ कायद्यांतर्गत गुन्हा नोंद करण्यात आला आहे. अविनाश शेळके, गोविंद काकडे आणि पीडितेची आई अशी गुन्हा नोंद झालेल्यांची नावे आहेत. या प्रकरणी पीडितेने स्वत: वाघोली पोलिसांकडे तक्रार प्रविष्ट (दाखल) केली आहे. (बलात्कार पीडितेची आईही दुष्कृत्यामध्ये सहभागी असणे, हे समाजाची नीतीमत्ता खालावल्याचे लक्षण ! – संपादक)

१. पीडिता एका कापड दुकानांमध्ये काम करत असतांना शेळके याने तिच्याशी मैत्री केली. त्याने लग्नाचे आमीष दाखवून ३ वेळा बळजोरीने शारीरिक संबंध निर्माण केले.

२. पीडितेची अश्लील छायाचित्रे काढून ती सामाजिक माध्यमांवर प्रसारित करण्याची धमकी देऊन शेळके याने पुन्हा संबंध निर्माण केले.

३. काकडे हा पीडितेच्या आईचा मित्र आहे. त्याने घरात कुणीही नसतांना पीडितेच्या समवेत बळजोरीने शारीरिक संबंध ठेवले.

४. ही घटना पीडितेने आईला सांगितली. तेव्हा आईने तिलाच धमकी देत पोलिसांमध्ये तक्रार करू दिली नाही. पीडितेस या संबंधांतून त्रास होऊ लागल्याने तिची वैद्यकीय पडताळणी केली असता ती गरोदर असल्याचे निष्पन्न झाले.