दाबोळी येथे दीड कोटी रुपये किमतीचे पेट्रोल कह्यात

वास्को – गुन्हे शाखेने २७ जून या दिवशी दाबोळी येथे अनधिकृतरित्या इंधन साठवणूक केलेल्या ठिकाणी धाड घालून अनुमाने दीड कोटी रुपये किमतीचे ६ इंधन टँकर, १ टिपर ट्रक आणि पेट्रोलियम पदार्थ कह्यात घेतले. अनुमाने ६ घंटे चाललेल्या या कारवाईच्या वेळी अधिकार्‍यांना टँकरमध्ये संशयास्पद पेट्रोलियम पदार्थ साठवून ठेवलेले आढळले. त्याचे नमुने फॉरेन्सिक पडताळणीसाठी घेण्यात आले आहेत. प्राथमिक अन्वेषणात हे पेट्रोलियम पदार्थ काळ्या बाजारात विक्रीसाठी वळवले जात असल्याचा संशय पोलिसांनी व्यक्त केला आहे. पोलिसांच्या प्राथमिक अन्वेषणानुसार संबंधित भूमी आणि कह्यात घेण्यात आलेली वाहने सांकवाळ येथील देवेंद्र नाईक उपाख्य राजू चव्हाण यांच्या मालकीची आहेत.