Pakistan Suicide Attack : पाकिस्तानात आत्मघातकी आक्रमणात ५ चिनी अभियंते ठार

पेशावर (पाकिस्तान) : पाकच्या खैबर पख्तुनख्वा येथे झालेल्या आत्मघातकी आक्रमणामध्ये ५ चिनी अभियंते आणि १ पाकिस्तानी नागरिक ठार झाले आहेत. चिनी अभियंत्यांचे वाहन बेशम शहरातून जात असतांना हे आक्रमण करण्यात आले. आतंकवाद्यांच्या स्फोटकांनी भरलेल्या वाहनाने अभियंत्यांच्या वाहनाला धडक दिल्यावर मोठा स्फोट झाला. त्यानंतर चिनी अभियंत्यांचे वाहन दरीत कोसळले. पोलीस घटनास्थळी पोचले असून त्यांनी साहाय्य कार्य आरंभले आहे. याविषयी चीनकडून अद्याप कोणतीही प्रतिक्रिया व्यक्त करण्यात आलेली नाही.

यापूर्वीही ठार झाले होते चिनी नागरिक !

या परिसरात वर्ष २०२१ मध्ये आतंकवाद्यांनी आत्मघातकी आक्रमण केले होते. या आक्रमणात १३ जण ठार झाले होते. त्यांपैकी ९ चिनी नागरिक होते.