म्हापसा येथे पोलिसात तक्रार नोंद, तर पणजी येथे ‘अभाविप’ची निषेध सभा

विद्यार्थी आंदोलनात उमर खालिदच्या समर्थनार्थ फलक घेतल्याचे प्रकरण

पणजी, २६ जुलै (वार्ता.) – राष्ट्रीय पात्रता आणि प्रवेश परीक्षेतील (‘नीट’ परीक्षेतील) प्रश्नपत्रिका फुटीच्या (पेपरफुटीच्या) प्रकरणी म्हापसा येथील लोहिया उद्यान येथे २४ जुलै या दिवशी सायंकाळी, तसेच केंद्रीय शिक्षणमंत्री धमेंद्र प्रधान यांनी पदाचे त्यागपत्र दिल्यानंतर आझाद मैदान, पणजी येथे २५ जुलै या दिवशी सायंकाळी आयोजित केलेल्या आनंदोत्सव कार्यक्रमात ‘फ्री उमर खालिद, शार्जिल इमाम, भिमा कोरेगाव १६’, असे फलक प्रसारित करण्यात आले होते. देशद्रोह्यांचे समर्थन केल्याच्या या घटनेनंतर राज्यभरात तीव्र पडसाद उमटले. म्हापसा येथे २५ जुलैच्या रात्री म्हापसा येथील नागरिकांनी एकत्र येऊन म्हापसा पोलिसांकडे ‘फ्री उमर खालिद’ या आशयाचा फलक घेतलेल्या मुलीवर कारवाई करण्याची मागणी केली, तर ‘अभाविप’ने या प्रकरणी २६ जुलै या दिवशी पणजी येथील आझाद मैदानात निषेध सभेचे आयोजन केले.

म्हापसा येथे २५ जुलै या दिवशी सायंकाळी उशिरा अमेय नाटेकर, सिद्धार्थ मांद्रेकर, तुषार केळकर यांच्यासह अनुमाने २०० जणांच्या युवा कार्यकर्त्यांनी एकत्र येऊन म्हापसा पोलीस ठाण्यात एक निवेदन दिले. याप्रसंगी ‘फ्री उमर खालिद’ हा फलक घेऊन निर्दशनात सहभागी असलेल्या मुलीवर कारवाई करण्याची मागणी करण्यात आली.  या वेळी पोलिसांनी संबंधित मुलीला चौकशीसाठी पोलीस ठाण्यात बोलावणार असल्याचे आश्वासन दिले.

पणजी येथील आझाद मैदानात २६ जुलै या दिवशी सायंकाळी निषेध मोर्चाचे आयोजन करण्यात आले होते. या वेळी विद्यार्थ्यांचे नेते म्हणाले, ‘‘आम्ही विद्यार्थ्याच्या विरोधात नाही, तर विद्यार्थ्यांच्या नावाने देशाचे तुकडे करू पहाणार्‍यांच्या विरोधात आहोत. देहली येथून आलेले लोक गोव्यातील विद्यार्थी आंदोलनात सहभागी होत आहेत. विद्यार्थी आंदोलन देशद्रोह्यांनी ‘हायजॅक’ (अपहरण) करण्याचे पाप केले आहे. गोव्यातील विद्यार्थ्यांच्या पाठीत सुरा खूपसण्याचा हा प्रयत्न आहे. या लोकांनी पत्रकारांना ‘गोदी मिडिया’, असे हिणवले. देशद्रोही अशासकीय संघटनांवर कारवाई करावी.’’ पणजी येथील आझाद मैदानातील ‘अभाविप’च्या आंदोलनात मुख्यमंत्री डॉ. प्रमोद सावंत यांची मुलगी कु. पार्थिवी सावंत यांनीही सहभाग घेतला होता.

अराष्ट्रीय शक्तीचे अन्वेषण करा ! – सिद्धार्थ कुंकळेकर, भाजपचे नेते

गोव्यात झालेल्या विद्यार्थी आंदोलनात अराष्ट्रीय शक्ती समाविष्ट झाल्या आहेत. या प्रकरणी पोलिसांनी अन्वेषण करावे, अशी मागणी भाजपचे नेते सिद्धार्थ कुंकळेकर यांनी पणजी येथे आयोजित एका पत्रकार परिषदेत केली.

आंदोलनामध्ये राष्ट्रविरोधी फलक खपवून घेणार नाही ! – डॉ. प्रमोद सावंत, मुख्यमंत्री

 पणजी – २५ जुलैला पणजी येथील आझाद मैदानात केंद्रीय शिक्षणमंत्री धर्मेंद्र प्रधान यांनी त्यागपत्र दिल्यावरून आयोजित आनंदोत्सव कार्यक्रमात ‘फ्री उमर खालिद, शार्जिल इमाम’, असे फलक झळकले होते. या प्रकरणी पणजी पोलिसांनी महंमद डनीष याला कह्यात घेतले आहे. पणजी पोलिसांच्या या कारवाईला मुख्यमंत्री डॉ. प्रमोद सावंत यांनी पाठिंबा दिला. ते म्हणाले, ‘‘शांततापूर्ण मार्गाने आंदोलन करणे हा प्रत्येकाचा घटनात्मक अधिकार आहे; मात्र आंदोलनाच्या नावाने राष्ट्रविरोधी संदेश खपवून घेतले जाणार नाहीत. दोषीवर कठोर कारवाई करण्यात येणार आहे.’’