अभिव्यक्ती स्वातंत्र्याचा गैरवापर करून वर अधिकाराचा दावा कसा करता ? – सर्वोच्च न्यायालय

सनातन धर्माला संपवण्याचे विधान करणार्‍या उदयनिधी स्टॅलिन यांना सर्वोच्च न्यायालयाने फटकारले !

नवी देहली – ‘तुम्ही तुमच्या अभिव्यक्ती स्वातंत्र्याच्या अधिकाराचा गैरवापर केल्यानंतर आता सर्वोच्च न्यायालयात दाद मागण्याच्या अधिकाराचा दावा कसा करत आहात ?’ असा प्रश्‍न विचारत सर्वोच्च न्यायालयाने तमिळनाडूचे मुख्यमंत्री एम्.के. स्टॅलिन यांचे पुत्र उदयनिधी स्टॅलिन यांना फटकारले. उदयनिधी यांनी काही मासांपूर्वी सनातन धर्माची डेंग्यू-मलेरियाशी तुलना करून त्याला संपवण्याचे विधान केले होते. या संदर्भात उदयनिधी यांनी त्यांच्यावरील आरोपांना विरोध करणारी आणि कारवाईपासून संरक्षणासाठी दाद मागणारी याचिका प्रविष्ट (दाखल) केली होती. त्यावरील सुनावणीच्या वेळी न्यायालयाने त्यांना फटकारले. या प्रकरणाची पुढील सुनावणी १५ मार्च या दिवशी होणार आहे.

सौजन्य इंडिया टूडे 

तुम्ही मंत्री असल्याने अशा गोष्टींच्या परिणामांची कल्पना असायला हवी !

तुम्ही राज्यघटनेच्या कलम १९(१)(अ) अंतर्गत मिळणार्‍या अधिकारांचा गैरवापर केला. त्यांचा अवमान केला. आता तुम्ही कलम ३२ नुसार तुम्हाला मिळालेल्या दाद मागण्याच्या अधिकाराचा वापर करण्यासाठी सर्वोच्च न्यायालयात याचिका कशी करता ? तुम्ही जे काही म्हणाला आहात, त्याचे परिणाम काय होतील, हे तुम्हाला ठाऊक नव्हते का ? तुम्ही कुणी सामान्य व्यक्ती नाही, तर एक मंत्री आहात. तुम्हाला अशा गोष्टींच्या परिणामांची कल्पना असायला हवी, अशा शब्दांत न्यायालयाने स्टॅलिन यांचे कान टोचले.