Politics Against Shriram : प्रभु श्रीरामाविषयी राजकारण होणे अपेक्षित नाही ! – प.पू. स्वामी गोविंददेव गिरि महाराज

सोलापूर – प्रभु श्रीराम हे सर्व राजकारण्यांच्या वर आहेत. प्रभु श्रीराम हे संपूर्ण देशाचे आहेत. त्यामुळे श्रीरामाचे मंदिर होत आहे. हे काम सर्वांनी एकत्र येऊन करणे अपेक्षित आहे. ‘हमास’ने इस्रायलवर युद्ध लादल्यावर तेथील मंत्रीमंडळ विसर्जित होऊन ‘युद्ध मंत्रीमंडळ’ अस्तित्वात आले. त्याप्रमाणे प्रभु श्रीरामाच्या मंदिरासाठी आपण सगळ्यांनी एकत्र येणे आवश्यक असून त्यावर राजकारण होणे अपेक्षित नाही, असे प्रतिपादन प.पू. स्वामी गोविंददेव गिरि महाराज यांनी केले. ते सोलापूर येथील पत्रकार परिषदेत बोलत होते. श्रीराम मंदिराविषयी वार्तालाप करण्यासाठी ही परिषद आयोजित केली होती.

प.पू. स्वीमीजी पुढे म्हणाले,

१. श्रीराममंदिराच्या निर्मितीसाठी लाखो लोकांनी रक्त सांडले आहे. अनेक पिढ्या श्रीराम मंदिराच्या स्थापनेची वाट पहात आहेत. सर्व देश डोळ्यांत प्राण आणून श्रीरामाची प्राणप्रतिष्ठा कधी होईल ? याची वाट पहात आहे. त्यामुळे श्रीरामाच्या प्राणप्रतिष्ठेला अधिक विलंब न लावता त्याची स्थापना लवकरात लवकर कशी होईल ? ते आम्ही पहात आहोत. त्यामुळेच आम्ही २२ जानेवारी हा दिवस निवडला.

२. प्रभु श्रीरामाची स्थापना जरी आता होत असली, तर त्यासाठीचे अनुष्ठान गेले कित्येक दिवस अगोदरपासून चालू आहे. महाराष्ट्रातील पुणे येथील ११ जणांचा एक गट गेल्या सवा वर्षापासून तेथे अनुष्ठान करत आहे. हे सर्व ते त्यांच्या खर्चाने करत असून त्यांना त्यासाठी कोणतीही दक्षिणा देण्यात येत नाही. १७ जानेवारीला प्रभु श्रीरामाचे आगमन होईल आणि १८ जानेवारीपासून पूजाविधी चालू होतील. २२ जानेवारीपर्यंत विविध विधी होतील.

३. ‘काही लोकांना निमंत्रण दिले नाही’, असा आरोप होत आहे; मात्र जे लोक निमंत्रण नाकारणार नाही, अशांनाच ते दिले जात आहे. ज्याप्रमाणे ‘पद्म’ पुरस्कार देण्याच्या अगोदर ‘मी हा पुरस्कार नाकारणार नाही’, असे प्रतिज्ञापत्र लिहून घेतले जाते; कारण हा पुरस्कार नाकारणे, म्हणजे देशाचा अवमान असल्यासारखे आहे. श्रीराममंदिर न्यासाकडून प्रत्येकाला निमंत्रण दिले जाऊ शकते; मात्र एखाद्याने निमंत्रण नाकारले, तर ते योग्य होणार नाही.