डोंबिवली शहराजवळील खाडीतून मोठ्या प्रमाणात अवैध वाळूचा उपसा !

डोंबिवली – मोठागाव, कोपर भागात, देवीचा पाडा, मेंग्या बाबा मंदिर येथे दिवस-रात्र अवैध रेती उपसा प्रचंड मोठ्या प्रमाणात चालू आहे. उल्हास खाडीतून तब्बल १० ते १२ सक्शन पंपांच्या साहाय्याने हा उपसा होत आहे. या अवैध प्रकाराकडे शासकीय यंत्रणांचे दुर्लक्ष झालेले दिसत आहे. उपसलेली रेती रात्रीच तात्काळ खाडी किनारी आणून ती डम्परमध्ये टाकून विक्रीसाठी नेली जात आहे.

काही दिवसांपूर्वी सतत कारवाया होत असल्याने हा उपसा नियंत्रित झाला होता. महसूल विभागाकडून रेती माफियांवर नियमित कारवाई चालू असूनही ठराविक भागात मात्र वाळू तस्कर महसूल अधिकार्‍यांना दाद देत नसल्याचे लक्षात येते.

या तस्करांकडे शस्त्रे असतात. त्यामुळे स्थानिक नागरिक, महसूल अधिकारी या तस्करांना रोखण्यासाठी पुढाकार घेत नाहीत, असे लक्षात येते. त्यांच्याविरोधातील तक्रारीकडे कुणीही लक्ष देत नसल्याचे स्थानिकांचे म्हणणे आहे.