धर्माचरण आणि साधना केल्यासच हिंदु राष्ट्राची स्थापना होईल ! – सद्गुरु नंदकुमार जाधव, धर्मप्रचारक, सनातन संस्था

नंदुरबार, १२ डिसेंबर (वार्ता.) – भारत देश पूर्वी आर्थिकदृष्ट्या सक्षम होता. तो विश्वालाही मार्गदर्शन करत होता. त्या काळी मंदिरे म्हणजे चैतन्याचे स्रोत होते. आज परिस्थिती पालटलेली दिसते. सर्वत्र पाश्चात्त्य संस्कृतीचे अंधानुकरण चालू आहे. हिंदुत्वनिष्ठ आणि साधू यांच्या हत्या होत आहेत. अल्पसंख्यांकांच्या लांगूलचालनासाठी स्वतंत्र अल्पसंख्यांक आयोग आणि मंत्रालय यांची स्थापना होत आहे; मात्र बहुसंख्य हिंदूंसाठी कोणताही आयोग किंवा मंत्रालय नाही. भारतीय राज्यघटनेत समानतेचे तत्त्व असतांना हा दुजाभाव कशासाठी ? छत्रपती शिवाजी महाराजांनी माता जगदंबेच्या कृपाशीर्वादाने हिंदवी स्वराज्याची स्थापना केली. त्याचप्रमाणे आपणही धर्माचरण आणि साधना केल्यास हिंदु राष्ट्राची स्थापना होणारच आहे, असे मार्गदर्शन सनातनचे धर्मप्रचारक सद्गुरु नंदकुमार जाधव यांनी केले.

जिल्ह्यातील तळोदा येथे हिंदु जनजागृती समितीच्या वतीने ११ डिसेंबर या दिवशी येथे हिंदु राष्ट्र-जागृती सभा पार पडली. या सभेत ते बोलत होते. दीपप्रज्वलन आणि वेदमंत्रपठण यांनी सभेला प्रारंभ झाला. या सभेला समितीचे महाराष्ट्र आणि छत्तीसगड राज्य संघटक श्री. सुनील घनवट, समितीच्या नंदुरबार जिल्हा समन्वयक कु. रागेश्री देशपांडे यांनी संबोधित केले. सभेला ३ सहस्रांहून अधिक हिंदूंची उपस्थिती लाभली.

माता-भगिनींनो, स्वसंरक्षणासाठी सिद्ध व्हा ! – कु. रागेश्री देशपांडे

हिंदु धर्मातील मैत्रेयी, गार्गी, ब्रह्मपुत्रा, राजमाता जिजाऊ, राणी लक्ष्मीबाई, अहिल्याबाई होळकर, राणी चेनम्मा अशा पराक्रमी स्त्रियांनी धर्मज्योत तेवत ठेवली. आज महिलांची स्थिती कशी आहे ? महिलांवरील अन्याय आणि अत्याचार यांच्या घटनांत वाढ होत आहे. वर्ष २०२१ मध्ये बलात्काराच्या ३१ सहस्र ६७७ तक्रारी प्राप्त झाल्या आहेत. अनेक युवती लव्ह जिहाद आणि धर्मांतर यात अडकत आहेत. ‘बॉलिवूड’ही लव्ह जिहादला प्रोत्साहन देत आहे. हे थांबण्यासाठी महिलांनी स्वसंरक्षण प्रशिक्षण घेऊन सिद्ध व्हावे !

हिंदूंनो, हिंदु राष्ट्र स्थापनेसाठी कटीबद्ध व्हा ! – सुनील घनवट

नंदुरबार जिल्ह्यातील अनेक भागांत ख्रिस्ती मिशनर्‍यांकडून आदिवासी बांधवांना आमीष दाखवून धर्मांतर करण्याचे षड्यंत्र मोठ्या प्रमाणावर चालू आहे. उल्हासनगर जिल्ह्यात १ लाख २५ सहस्र सिंधी बांधवांचे धर्मांतर झाले आहे. आदिवासी बांधवांची भूमी खरेदी करता येत नाही; म्हणून काही अन्य धर्मियांकडून त्यांच्या मुलींशी प्रेमाचे खोटे नाटक करून त्यांच्याशी विवाह केला जातो. त्यानंतर त्यांच्या शेतभूमी हडप केल्या जातात. नंदुरबारला लागूनच गुजरात आणि मध्यप्रदेश यांची सीमा असल्याने तेथून मोठ्या प्रमाणात गोतस्करी केली जाते. या सर्व समस्यांवर एकच पर्याय आहे तो म्हणजे हिंदु राष्ट्राची स्थापना ! त्यामुळे सर्वत्रच्या हिंदूंनी हिंदु राष्ट्र स्थापनेसाठी कटीबद्ध व्हावे !