मुंबईमध्ये उत्साहाच्या भरात अनेकांकडून राष्ट्रध्वजाचा अवमान !

मुंबई, १५ ऑगस्ट (वार्ता.) – ‘हर घर तिरंगा’ अभियानाच्या अंतर्गत केंद्रशासनाने नागरिकांना घरोघरी राष्ट्रध्वज फडकवण्याचे आवाहन केले होते. केंद्रशासनाच्या या अभियानाच्या पार्श्वभूमीवर महाराष्ट्र शासनानेही १३ ते १५ ऑगस्ट या कालावधीत ‘घरोघरी तिरंगा’ हे अभियान राबवले होते. यानुसार उत्साहाच्या भरात राष्ट्रध्वज लावतांना ठिकठिकाणी राष्ट्रध्वजाचा अवमान होत असल्याचे आढळून आले आहे.

मुंबईमध्ये अनेक ठिकाणी खिडक्यांमध्ये कपडे वाळत घातल्याप्रमाणे चिमटे लावून दोर्‍यांना राष्ट्रध्वज लावले होते. काही ठिकाणी राष्ट्रध्वज आडवा न लावता उभा लावण्यात आला. अनेक दुकानांमध्ये लावलेले राष्ट्रध्वज काठीसह भूमीकडे झुकलेले असल्याचे आढळले. वाहनांवर लावण्यात आलेल्या नायलॉनच्या राष्ट्रध्वजांचे धागे निघाले होते.