भोजनातून गुंगीचे औषध देऊन ९ कलाकारांच्या अंगावरील सोन्याच्या दागिन्यांची चोरी

कोल्हापूर – येथील लक्ष्मीपुरी परिसरातील एका यात्री निवासमध्ये ३ फेब्रुवारी या दिवशी भोजनातून गुंगीचे औषध देऊन ९ कलाकारांच्या अंगावरील सोन्याचे दागिने चोरून नेण्यात आले. सकाळी व्यवस्थापकाने खोली पहाणी करण्यासाठी उघडली असता हा प्रकार उघडकीस आला. हे सर्व कलाकार लातूर जिल्ह्यातील राचनवाडी येथील असून हे सर्वजण देवीच्या गाण्याच्या कार्यक्रमासाठी आले होते. लक्ष्मीपुरी पोलीस ठाण्यातील पोलिसांनी याचे अधिक अन्वेषण केले असता रात्री भोजनामध्ये गुंगीचे औषध घालून कलाकारांना बेशुद्ध करण्यात आले आणि सर्वांच्या अंगावरील सोन्याचे दागिने चोरून नेण्यात आल्याचे उघड झाले. ‘सीसीटीव्ही’च्या साहाय्याने पोलीस अधिक अन्वेषण करत आहेत.