सांगलीतील ९ कोटी रुपयांच्या चोरीच्या प्रकरणातील मुख्य संशयित मैनुद्दीन मुल्ला याची हत्या

सांगली, ३० जानेवारी – वारणानगर (जिल्हा कोल्हापूर) येथील ९ कोटी रुपयांच्या चोरीच्या प्रकरणातील मुख्य संशयित मैनुद्दीन मुल्ला याची २९ जानेवारीला गणेशनगर भागात रात्री ९ वाजता हत्या करण्यात आली. वर्ष २०१६ मध्ये सांगली-मिरज रस्त्यावरील बेथलमनगर येथील मुल्ला याच्या घरातून ९ कोटी रुपये पोलिसांनी कह्यात घेतले होते. या प्रकरणात अन्वेषण करणार्‍या पोलिसांनी यातील पैसे घेतल्याने तत्कालीन पोलीस निरीक्षकांसह ७ पोलीस कर्मचार्‍यांना या प्रकरणी अटक झाली होती. (भ्रष्टाचारी पोलीस ! चोराकडील रकमेची चोरी करणारे पोलीस खात्याची सर्व अब्रू धुळीस मिळवत आहेत, असेच म्हणावे लागेल. – संपादक) याच प्रकरणात मुल्ला हा सध्या जामिनावर बाहेर होता. सांगली शहर पोलीस या प्रकरणाचे अधिक अन्वेषण करत आहेत.