दृष्ट काढल्यानंतर दृष्ट काढलेल्या वस्तूंवर होणारा परिणाम

दृष्ट काढण्यासंबंधी अद्वितीय संशोधन करणारे महर्षि अध्यात्म विश्‍वविद्यालय

महर्षि अध्यात्म विश्‍वविद्यालयाने युनिव्हर्सल ऑरा स्कॅनर (यू.ए.एस्.) या उपकरणाद्वारे केलेली वैज्ञानिक चाचणी

परात्पर गुरु डॉ. आठवले ईश्‍वरी राज्याच्या स्थापनेचे महान समष्टी कार्य करत आहेत. या कार्यात अडथळे आणण्यासाठी अनिष्ट शक्ती सूक्ष्मातून परात्पर गुरु डॉक्टरांवर सतत आक्रमण करतात. यामुळे परात्पर गुरु डॉक्टरांना विविध प्रकारचे शारीरिक त्रास होतात. त्यांना होणारे त्रास दूर व्हावेत, यासाठी महर्षि आणि काही संत विविध आध्यात्मिक स्तरावरील उपाय करण्यास सांगतात. परात्पर गुरु डॉक्टर ते सर्व उपाय भावपूर्ण करतात. महाराष्ट्रातील कोल्हापूर जवळील श्री क्षेत्र अप्पाची वाडी, कुर्ली येथील श्री हालसिद्धनाथांनी पू. भगवान डोणे महाराज यांच्या माध्यमातून दही-भात, काळे तीळ, आडवे चिरलेले एक लिंबू आणि एक केळं या वस्तू एका पत्रावळीत ठेवून त्याने परात्पर गुरु डॉक्टरांची दृष्ट काढण्यास सांगितले. त्यानुसार ३.८.२०१९ या दिवशी सद्गुरु (डॉ.) मुकुल गाडगीळ यांनी परात्पर गुरु डॉक्टरांची दृष्ट काढली. दृष्ट काढल्यानंतर दृष्ट काढलेल्या वस्तूंवर काय परिणाम होतो ? हे विज्ञानाद्वारे अभ्यासण्यासाठी दृष्ट काढायच्या वस्तूंची आणि दृष्ट काढल्यावर वस्तूंची यू.ए.एस्. (युनिव्हर्सल ऑरा स्कॅनर) या उपकरणाद्वारे चाचणी करण्यात आली. चाचणीतील निरीक्षणांचे विवेचन, निष्कर्ष आणि अध्यात्मशास्त्रीय विश्‍लेषण पुढे दिले आहे.

१. चाचणीतील निरीक्षणांचे विवेचन

१ अ. नकारात्मक आणि सकारात्मक ऊर्जेच्या संदर्भातील निरीक्षणांचे विश्‍लेषण – दृष्ट काढल्यानंतर दृष्ट काढलेल्या वस्तूंतील सकारात्मक ऊर्जा नाहीशी होऊन त्यांच्यामध्ये पुष्कळ नकारात्मक ऊर्जा निर्माण होणे : आरंभी (दृष्ट काढण्यापूर्वी) दृष्ट काढण्यासाठीच्या वस्तूंमध्ये नकारात्मक ऊर्जा मुळीच नसून सकारात्मक ऊर्जा होती. त्या वस्तूंनी परात्पर गुरु डॉक्टरांची दृष्ट काढल्यानंतर त्या वस्तूंतील सकारात्मक ऊर्जा नाहीशी होऊन त्यांच्यामध्ये पुष्कळ प्रमाणात इन्फ्रारेड आणि अल्ट्राव्हायोलेट या नकारात्मक ऊर्जा निर्माण झाल्या, हे पुढे दिलेल्या सारणीतून लक्षात येते.

२. निष्कर्ष

दृष्ट काढल्यानंतर दृष्ट काढलेल्या वस्तूंमध्ये पुष्कळ नकारात्मक ऊर्जा निर्माण झाली. याचे कारण हे की, दृष्ट लागलेल्या व्यक्तीभोवतीची त्रासदायक स्पंदने दृष्ट काढलेल्या वस्तूंमध्ये खेचली गेली.

३. चाचणीतील निरीक्षणांचे अध्यात्मशास्त्रीय विश्‍लेषण

३ अ. दृष्ट काढल्याने व्यक्तीचे स्थूलदेह, मनोदेह आणि सूक्ष्मदेह यांवर आलेले रज-तमात्मक आवरण (त्रासदायक स्पंदने) दूर होणे : व्यक्तीला दृष्ट लागल्याने तिच्याभोवती रज-तमात्मक आवरण (त्रासदायक स्पंदने) निर्माण होते. त्यामुळे तिचा स्थूलदेह, मनोदेह आणि सूक्ष्मदेह यांवर अनिष्ट परिणाम होऊ शकतो. ज्या वेळी व्यक्तीचा स्थूलदेह रज-तमात्मक स्पंदनांनी भारित होतो, त्या वेळी ती शारीरिक व्याधींनी त्रस्त होते. शारीरिक व्याधींमध्ये तीव्र डोकेदुखी, कान ठणकणे, डोळे दुखणे, डोळ्यांपुढे अंधारी येणे, हाता-पायांना मुंग्या येणे, छातीत धडधडणे, हात-पाय गार पडून गळून जाणे इत्यादी त्रास होतात. दृष्ट काढल्याने तिचा स्थूलदेह, मनोदेह आणि सूक्ष्मदेह यांवर आलेले रज-तमात्मक आवरण दूर होते. यामुळे व्यक्तीला होणारा त्रास उणावतो किंवा नाहीसा होतो.

३ आ. दृष्ट काढल्यानंतर दृष्ट काढलेल्या वस्तूंतील सकारात्मक ऊर्जा नाहीशी होऊन त्यांच्यामध्ये पुष्कळ प्रमाणात नकारात्मक ऊर्जा आढळणे : दृष्ट काढण्यासाठी वापरल्या जाणार्‍या घटकांत रज-तमात्मक लहरी आकृष्ट करून त्या घनीभूत करून मग त्यांचे उच्चाटन करण्याची क्षमता असते. मीठ-मोहरी, मीठ-मोहरी-लाल मिरच्या, लिंबू, नारळ इत्यादी विविध घटक दृष्ट काढण्यासाठी वापरतात. दृष्ट काढल्याने व्यक्तीभोवतीची त्रासदायक स्पंदने दृष्ट काढण्यासाठी वापरण्यात येणार्‍या वस्तूंमध्ये खेचली जातात. त्यामुळे व्यक्तीला होणारा त्रास न्यून किंवा नाहीसा होतो. श्री हालसिद्धनाथ महाराजांनी सांगितल्यानुसार परात्पर गुरु डॉक्टरांची दृष्ट काढल्याने त्यांच्या भोवतीची त्रासदायक स्पंदने दृष्ट काढलेल्या वस्तूंमध्ये खेचली गेली. यामुळे त्या वस्तूंतील सकारात्मक ऊर्जा नाहीशी होऊन त्यांच्यामध्ये पुष्कळ नकारात्मक ऊर्जा आढळली.

– प्रा. सुहास जगताप, महर्षि अध्यात्म विश्‍वविद्यालय, गोवा. (९.१०.२०२०)

ई-मेल : [email protected]

सूक्ष्म : व्यक्तीचे स्थूल म्हणजे प्रत्यक्ष दिसणारे अवयव नाक, कान, डोळे, जीभ आणि त्वचा ही पंचज्ञानेंद्रिये आहेत. ही पंचज्ञानेंद्रिये, मन आणि बुद्धी यांच्या पलीकडील म्हणजे  ‘सूक्ष्म’. साधनेत प्रगती केेलेल्या काही व्यक्तींना या ‘सूक्ष्म’ संवेदना जाणवतात. या ‘सूक्ष्मा’च्या ज्ञानाविषयी विविध धर्मग्रंथांत उल्लेख आहेत.