रंगकाम करण्यासाठी लवकरच बाजारात येणार गायीच्या शेणापासून बनवलेले वेदिक रंग ! – नितीन गडकरी

भारतीय प्राचीन पद्धतीकडे आता समाज वळू लागला आहे, हे यातून पुन्हा एकदा स्पष्ट होत आहे; मात्र गायीचे शेण मिळण्यासाठी प्रथम गायी जिवंत रहाणे आवश्यक आहे. त्यासाठी केंद्र सरकार काय करणार आहे ?, हेही गडकरी यांनी जनतेला सांगायला हवे, असे हिंदूंना वाटते !

नवी देहली – देशातील अनेक गावांतील घरे आजही गायीच्या शेणाने सारवली जातात. भूमीही सारवली जाते. आता याच शेणाचा वापर करून रंगकाम करण्यासाठी रंग बनवण्यात येत आहेत. लवकरच खादी आणि ग्रामउद्योग आयोगाकडून ‘वेदिक पेंट’ विक्री करणार आहे, अशी माहिती केंद्रीयमंत्री नितीन गडकरी यांनी दिली.

नितीन गडकरी यांनी सांगितले की, या वेदिक रंगांमुळे शेतकर्‍यांना आर्थिक लाभ होणार आहे. यामुळे ज्यांच्याकडे गायी आहेत, त्यांना वार्षिक ५५ सहस्र रुपयांचे उत्पन्न मिळू शकते. वेदिक रंग ‘डिस्टेंपर’ आणि ‘इमल्शन’ अशा २ प्रकारांत उपलब्ध होणार आहे. हे रंग पर्यावरणपूरक, नॉन टॉक्सिक, विषाणूविरोधी, अ‍ॅन्टी फंगल आणि वॉशेबल आहेत. रंगरंगोटी झाल्यावर केवळ ४ घंट्यांत हा रंग वाळणार आहे.