शेख हसीना यांनी डिसेंबरमध्ये बांगलादेशात परतण्याची केली घोषणा !

नवी देहली – ते मला अटक करू शकतात, मला मारूही शकतात; पण तरीही मी परत जाईन, अशा शब्दांत बांगलादेशाच्या माजी पंतप्रधान शेख हसीना यांनी त्यांच्या मायदेशी परतण्याची घोषणा केली आहे. त्यांनी सांगितले की, त्या डिसेंबर २०२६ च्या सुमारास बांगलादेशात परत जातील आणि न्यायालयात आत्मसमर्पण करतील. त्यांनी ‘रॉयटर्स’ वृत्तसंस्थेला दूरभाषवरून दिलेल्या मुलाखतीत ही माहिती दिली. २ वर्षांपूर्वी बांगलादेशात ‘जमात-ए-इस्लामी’ संघटनेने केलेल्या हिंसाचारानंतर त्यांना देश सोडून भारतात शरण घ्यावी लागली आहे.

मुलाखतीत शेख हसीना यांनी म्हटले आहे, ‘मी बांगलादेशाला परतताच ते मला अटक करू शकतात, ते मला मारूही शकतात; परंतु मला जावेच लागेल. जर माझा मृत्यू झाला, तर तो माझ्या देशाच्या भूमीवर व्हावा, जिथे माझे आई-वडील दफन आहेत. माझ्या पक्षाचे नेते आणि कार्यकर्ते यांच्यावर प्रचंड दडपशाही होत आहे.’