गुरुपौर्णिमेपूर्वीच जयपूर (राजस्थान) येथील साधकांनी अनुभवला गुरुपौर्णिमा सोहळा !

श्रीचित्‌शक्ति (सौ.) अंजली गाडगीळ यांनी केलेल्या मार्गदर्शनातील सूत्रे

१. संकल्प-विकल्पामध्ये मनाची पुष्कळ ऊर्जा वाया जाते. मनाच्या ऊर्जेचा साधनेसाठी उपयोग केल्याने मन-बुद्धीचा त्याग होईल.

२. आई-वडिलांना वाटते की, आपल्याला जे मिळाले नाही, त्या सर्व म्हणजे भौतिक गोष्टी मुलांना मिळाव्यात; पण ‘मुलांना या जन्मात देव मिळाला पाहिजे’, असे आई-वडिलांना वाटले पाहिजे.

३. देव साधना करणार्‍याच्या कुटुंबियांचाही भार वहातो. धर्मकार्यासाठी आणि गुरूंच्या कार्यासाठी जे युवा बाहेर पडतात, त्यांना सेवेसाठी आई-वडिलांनी प्रोत्साहन द्यायला हवे. धर्मकार्यासाठी माया सोडून देवाच्या कृपेची अनुभूती घ्या.

४. आपण गुरूंच्या छायेपासून, म्हणजे साधनेपासून जेव्हा दूर जातो, तेव्हा दुःखाचे संकट कोसळते.

५. कलियुगात चेहर्‍यावर हास्य टिकवून ठेवणे, म्हणजे आनंदी रहाणे सोपे नाही. लोक सहस्रो रुपयांचे तिकिट काढून हास्याच्या कार्यक्रमाला जातात. केवळ साधनेमुळेच आपण आनंदी राहू शकतो.

६. साधकांनी न्यूनगंड बाळगायला नको; कारण साधकांच्या मनात गुरुदेव आहेत.

७. समाज म्हणजे श्रीविष्णूचे विश्वस्वरूपच आहे. समष्टी साधना केल्याने, म्हणजे अध्यात्मप्रसार केल्याने या विश्वरूपाचा आशीर्वाद आपल्याला प्राप्त होतो.

८. गुरुदेव (सच्चिदानंद परब्रह्म डॉ. आठवले) साधकांचे आध्यात्मिक त्रास स्वतःवर घेऊन साधकांचे प्रत्येक क्षणी रक्षण करत आहेत. साधकांनीही मायेचे बंध सोडून झोकून देऊन साधना करायला हवी.