भाजपचे आमदार शंकर जगताप यांचे सांस्कृतिक मंत्र्यांना पत्र

सिंधुदुर्ग – सिंधुदुर्ग गडावर छत्रपती राजाराम महाराज यांनी वर्ष १६९५ मध्ये ऐतिहासिक श्री शिवराजेश्वर मंदिराची स्थापना केली. छत्रपती शिवाजी महाराज यांच्या मूर्तीचे पूजन होणारे हे भारतातील एकमेव मंदिर असून या ऐतिहासिक स्थळासाठी वर्ष १९७१ पासून महसूल विभागाकडून अत्यल्प अनुदान दिले जात आहे. मंदिराची दयनीय अवस्था आणि अत्यंत तोकडे अनुदान यांविषयी चिंचवड विधानसभेचे भाजपचे आमदार शंकर जगताप यांनी राज्य सरकारचे लक्ष वेधले आहे.

हिंदु जनजागृती समितीचे महाराष्ट्र आणि छत्तीसगड राज्य संघटक श्री. सुनील घनवट यांनी दिलेल्या निवेदनाचा संदर्भ देत आमदार जगताप यांनी सांस्कृतिक कार्य मंत्री आशिष शेलार यांना एका पत्राद्वारे मंदिराच्या वार्षिक अनुदानात भरीव वाढ करून मंदिर आणि परिसराच्या संवर्धनासाठी विशेष निधी उपलब्ध करून देण्याची मागणी केली आहे. तत्कालीन मुख्यमंत्री एकनाथ शिंदे यांनी हे अनुदान वाढवण्याचे निर्देश दिले होते, तरीही त्याची प्रभावी कार्यवाही न झाल्याविषयी आमदार जगताप यांनी तीव्र खंत व्यक्त केली आहे.