विटा (सांगली) येथे लसीकरणानंतर ४ महिन्यांच्या बालिकेचा मृत्यू; संतप्त नातेवाइकांचा रुग्णालयात ठिय्या !

प्रशासनाच्या निष्काळजीपणामुळे निष्पाप जिवाचा मृत्यू झाल्याचा आरोप !

विटा – येथील ग्रामीण रुग्णालयात प्रशासनाच्या अक्षम्य हलगर्जीपणामुळे एका ४ महिन्यांच्या निष्पाप बालिकेला प्राण गमवावे लागले आहे. १५ जून या दिवशी दुपारी सोना तिरुपती राठोड या बालिकेला रुग्णालयात ‘पेंटा १’, ‘आयपीव्ही’, ‘रोटा १’ आणि ‘पोलिओ’ प्रतिबंधक लसी देण्यात आल्या होत्या. लसी दिल्यानंतर बालिकेला तीव्र ताप आला आणि रात्रभर ती अस्वस्थ होती. अंततः १६ जूनच्या पहाटे ५ वाजण्याच्या सुमारास तिचा मृत्यू झाला.

या धक्कादायक घटनेमुळे संतप्त झालेले नातेवाईक आणि नागरिक यांनी रुग्णालयात प्रशासनाच्या विरोधात तीव्र संताप व्यक्त केला. १५ जूनला अन्य २५ बालकांनाही लस देण्यात आली होती, त्यांच्या प्रकृतीची प्रशासनाने चौकशी का केली नाही ? असा प्रश्न करत नातेवाइकांनी रुग्णालयात ठिय्या मांडला. नातेवाइकांच्या मागणीनंतर बालिकेचा मृतदेह उत्तरीय पडताळणीसाठी मिरज येथील शासकीय वैद्यकीय महाविद्यालयात पाठवण्यात आला आहे. या प्रकरणी सखोल चौकशी करून दोषींवर कठोर कारवाई करण्याची मागणी नागरिकांनी केली आहे.