तुळजापूर येथील छत्रपती संभाजी महाराज बस (जुने) स्थानकातील गैरसोयींमुळे प्रवाशांची कुचंबणा !

श्री. गोपीचंद व्हनमारे, सोलापूर

तुळजापूर (जिल्हा धाराशिव) – येथील छत्रपती संभाजी महाराज (जुने) बसस्थानकाचे नुकतेच नूतनीकरण करण्यात आले. प्रशस्त बसस्थानक, आधुनिक प्रकाशदिवे, पिण्याच्या पाण्याची, तसेच प्रवाशांसाठी बसण्याची व्यवस्था, नवीन फरशी, बसण्यासाठी मार्बलचे कठडे आदी सुविधा उपलब्ध करून देण्यात आल्या आहेत; परंतु प्रवासी करत असलेल्या अस्वच्छतेमुळे आणि येथे नियमित स्वच्छता केली जात नसल्याने नूतनीकरणाला गालबोट लागले आहे.

१. बसस्थानक परिसरात ‘नो पार्किंग’ (वाहने उभी करू नका) असा फलक असूनही तेथे दुचाकी आणि चारचाकी वाहने उभी केली जातात. ‘नियमभंग केल्यास दंड आकारला जाईल’, असे फलक असतांनाही संबंधित वाहनांवर कारवाई होतांना दिसत नाही.

२. ठिकठिकाणी पानमसाल्याच्या पिचकार्‍या मारण्यात आल्याने प्रवाशांना उभे रहावे लागते.

३. परिसरात एक जलशीतकरण यंत्र असून तेही बंद आहे. त्यामुळे प्रवाशांना नळाचे पाणी प्यावे लागते. पिण्याच्या पाण्याच्या अडचणीमुळे बाहेरील विक्रेते प्रवाशांना १५ रुपयांची पाण्याची बाटली २० रुपयांना विकत आहेत; मात्र बसस्थानकातील अधिकारी त्यांना विरोध करत नाहीत. त्यामुळे प्रवाशांना नाहक भुर्दंड सहन करावा लागतो. याविषयी आगारप्रमुखांना सांगितल्यावर त्यांनी ‘आम्ही कारवाई करतो’, असे मुळमुळीत उत्तर दिले; पण तशी कारवाई झाल्याचे आढळले नाही.

४. नियंत्रण कक्ष बंद अवस्थेत आहे.