US-Iran Peace Deal : शांतता कराराच्या विरोधात इराणी नागरिक रस्त्यावर !

तेहरान (इराण) – इराण आणि अमेरिका यांच्यातील शांतता करार अंतिम टप्प्यात असतांना इराणमध्ये या कराराच्या विरोधात नागरिकांनी रस्त्यावर उतरून आंदोलन केले. ‘काहीही झाले, तरी अमेरिकेशी तह करू नका’, अशी मागणी आंदोलकांनी केली असून त्यांनी परराष्ट्रमंत्री अब्बास अराघची आणि संसदेचे अध्यक्ष महंमद बागेर गालिबाफ यांच्यावर टीका केली आहे.

इराणमधील विविध शहरांमध्ये निदर्शने केली जात असून हा करार इराणच्या हिताविरुद्ध असल्याचा आरोप आंदोलकांनी केला आहे. अमेरिकेसमवेतच्या वाटाघाटींमध्ये प्रमुख भूमिका बजावणार्‍या अराघची आणि गालिबाफ यांच्या विरोधात घोषणाही देण्यात आल्या. तेहरानमधील इब्न सिना चौकात मोठ मोर्चा काढण्यात आला, तर मशहद शहरात परराष्ट्र मंत्रालयासमोरही नागरिकांनी आंदोलन केले. ‘फार्स न्यूज एजन्सी’ने प्रसिद्ध केलेल्या व्हिडिओमध्ये आंदोलक अराघची यांच्या विरोधात घोषणा देतांना दिसत आहेत. ‘हॉर्मुझ सामुद्रधुनीतील इराणचा प्रभाव या करारामुळे अल्प होईल’, अशी भीती आंदोलकांनी व्यक्त केली.

करारात अमेरिकेला अवाजवी सवलती दिल्याचा आरोप !

आंदोलकांच्या मते, प्रस्तावित करारामुळे अमेरिकेला अवाजवी सवलती दिल्या जात असून हा इराणसाठी लाजिरवाणा करार ठरेल. त्यामुळे अराघची आणि गालिबाफ यांनी त्यागपत्र द्यावे.