Trump On Iran war :  शांतता करार लवकरच होणार : इराण युद्ध संपले ! – ट्रम्प यांचा दावा

वॉशिंग्टन (अमेरिका) – अमेरिका आणि इराण या दोन्ही देशांमध्ये शांतता कराराचा प्राथमिक मसुदा सिद्ध झाला असून त्यामुळे युद्ध संपले आहे, असा दावा अमेरिकेचे राष्ट्राध्यक्ष डॉनल्ड ट्रम्प यांनी केला. तथापि इराणने हा दावा फेटाळून लावत ‘करारावर कोणताही अंतिम निर्णय झालेला नाही’, असे म्हटले आहे. या युद्धात सर्वांत कळीचे सूत्र असलेल्या इराणच्या अणूकार्यक्रमाविषयी अद्याप चर्चा झाली नसल्याचे सांगण्यात येत आहे.

१४ जून या दिवशी दोन्ही देश जिनिव्हा येथे कराराच्या मसुद्यावर स्वाक्षरी करण्याची शक्यता आहे. अमेरिकेचे उपराष्ट्रपती जे.डी. व्हान्स आणि इराणच्या संसदेचे अध्यक्ष महंमद बाकेर गालिबाफ हे या वेळी उपस्थित रहाण्याची शक्यता आहे. ट्रम्प यांच्या दाव्यामुळे कच्च्या तेलाच्या किमती प्रति बॅरल ९० डॉलरच्या (अनुमाने ८ सहस्र ५६५ रुपयांच्या) खाली घसरल्या.

काय आहे करारात ?

१. करारातील इराणची सूत्रे : अमेरिकेने इराणवरील निर्बंध हटवणे, अमेरिकेने इराणचा गोठवलेला अब्जावधी डॉलर्सचा परदेशी निधी मुक्त करणे आणि लेबनॉनमधील सैनिकी कारवाई थांबवणे, या सूत्रांचा प्रामुख्याने समावेश आहे.

२. करारातील अमेरिकेची सूत्रे : अमेरिकेच्या बाजूने इराणने उच्च-समृद्ध युरेनियम नष्ट करणे, इराणचा अणूकार्यक्रम थांबवणे आणि आतंकवादी संघटनांना आर्थिक पाठिंबा देण्याचे थांबवणे, या सूत्रांचा प्रामुख्याने समावेश आहे.