Abhishek Banerjee’s Home Raid : बंगाल पोलिसांकडून मध्यरात्री अभिषेक बॅनर्जी यांच्या घरावर धाड

कोलकाता (बंगाल) – बंगाल पोलिसांच्या एका मोठ्या पथकाने तृणमूल काँग्रेसचे राष्ट्रीय महासचिव अभिषेक बॅनर्जी यांच्या कालीघाट (पटुआपाडा) येथील निवासस्थानी धाड घातली. १२ जानेवारीच्या मध्यरात्री २.३० वाजता ही कारवाई करण्यात आली. धाड घालण्यासाठी आलेल्या पोलीस अधिकार्‍यांनी आरंभी बराच वेळ अभिषेक बॅनर्जी यांच्या घराचा दरवाजा ठोठावला; परंतु दार न उघडल्याने पोलिसांनी कडी तोडून घरात प्रवेश केला आणि अनुमाने ५ घंटे घराची कसून झडती घेतली. या कारवाईच्या वेळी केंद्रीय सुरक्षा दलांनी संपूर्ण परिसर बंद (सील) केला होता.

या घटनेची माहिती मिळताच ममता बॅनर्जी पहाटे पुतणे अभिषेक बॅनर्जी यांच्या घरी पोचल्या. यामुळे वातावरण अधिकच तणावपूर्ण बनले. या वेळी अभिषेक म्हणाले की, पोलिसांनी कडी तोडून संपूर्ण घराची झडती घेतली. आमच्याकडे सर्व चित्रीकरण आहे. तथापि आम्ही अन्वेषण यंत्रणांना संपूर्ण सहकार्य करू.

राज्य गुन्हे अन्वेषण विभागाने अभिषेक यांची बनावट स्वाक्षरी प्रकरणात नुकतीच ५.३० घंटे चौकशी केली. त्यांना १४ जूनला पुन्हा याच प्रकरणाच्या चौकशीसाठी बोलावण्यात आले आहे.

तृणमूल काँग्रेसच्या नेत्याच्या तक्रारीवरून कारवाई !

शालबनी येथील तृणमूल काँग्रेसच्या एका स्थानिक नेत्याने केलेल्या तक्रारीच्या आधारे ही कारवाई करण्यात आली. या तक्रारीत अभिषेक बॅनर्जी यांचे स्वीय्य साहाय्यक सुमित राय यांच्यावर निवडणूक तिकीट मिळवण्याच्या नावाखाली आर्थिक घोटाळा केल्याचा आरोप करण्यात आला आहे.