सोलापूर बसस्थानकात स्वच्छता आणि व्यवस्थापन यांचा बोजवारा !

 श्री. गोपीचंद व्हनमारे, सोलापूर

सोलापूर – येथील बसस्थानक हे राज्यातील एक महत्त्वाचे वाहतूक केंद्र आहे. सोलापूर येथून सध्या असलेले जुने मध्यवर्ती एस्.टी. बसस्थानक वाढत्या प्रवासी संख्येमुळे अपुरे पडत आहे. प्रवाशांच्या वाढत्या मागणीनुसार बसगाड्यांची संख्या वाढवली असली, तरी स्थानकातील स्वच्छता आणि व्यवस्थापन यांच्या गंभीर त्रुटी आढळून येत आहेत.

सध्या ५ कर्मचारी स्वच्छतेसाठी कार्यरत असून सकाळी ६ ते रात्री १० या वेळेत  स्वच्छता केली जाते. प्रत्यक्षात स्वच्छतेची स्थिती अत्यंत असमाधानकारक असल्याचे दिसून आले. ‘१ जूनपासून स्वच्छतेचे कर्मचारी वाढवण्यात येतील’, असे सांगण्यात आले; प्रत्यक्षात तसे दिसून आले नाही. स्वच्छतागृहात गुटखा खाऊन थुंकलेले असणे, प्रवासी बसण्यासाठी बाके अल्प प्रमाणात असल्याने प्रवाशांना खालीच बसावे लागणे या समस्या आहेत. फलाटही स्वच्छ केले नसल्याने प्रवाशांना अस्वच्छतेचा त्रास सहन करावा लागत आहे.

गाड्यांची खराब स्थिती आणि अस्वच्छता !

१. कित्येकदा बसगाड्यांची स्थितीही अत्यंत खराब असते. बसमध्ये रिकाम्या पाण्याच्या बाटल्या, खाऊची पाकिटे, टरफले आणि धूळ दिसून येते. स्थानकातील सुरक्षा व्यवस्थाही अपुरी असून सुरक्षा कर्मचारी कुठेच दिसत नव्हते.

२. बसस्थानकात भटक्या कुत्र्यांचा वावर वाढला असल्याने त्यामुळे प्रवाशांच्या सुरक्षेचा प्रश्न निर्माण झाला आहे.

३. येथील उपहारगृहात पिण्याच्या पाण्याच्या बाटलीसाठी २० रुपये आकारले जात असल्याची तक्रार आहे. स्थानकात पिण्याच्या पाण्याची सुविधा असली, तरी त्या ठिकाणी जो नळ आहे तो बंद असल्याने नागरिकांना पाणी विकत घ्यावे लागते.

४. ‘हिरकणी कक्ष’ हा महिला चालक आणि वाहक यांसाठी कपडे पालटण्याच्या खोलीमध्ये उभारण्यात आला असला, तरी त्या ठिकाणी कोणताही दिशादर्शक फलक लावण्यात आलेला नाही.

चालक-वाहक यांचे अस्वच्छ विश्रांतीगृह !

चालक आणि वाहक यांच्या विश्रांतीगृहांमध्ये मोठ्या प्रमाणात अस्वच्छता आहे. झोपण्यासाठी आवश्यक सोयींचा अभाव आहे. काही कर्मचार्‍यांनी गाद्यांची व्यवस्था केली असली, तरी अधिकृत पातळीवर कोणतीही सुविधा उपलब्ध नाही.

चालक-वाहक यांच्यासाठी असलेले शौचालय आणि स्नानगृह यांची अवस्था अत्यंत दयनीय असून अनेक ठिकाणी दारेही नाहीत. तात्पुरत्या पत्र्याच्या खोल्यांमध्ये कर्मचार्‍यांना विश्रांती घ्यावी लागत आहे. तेथेही स्वच्छतेचा अभाव आहे.