Tumkuru Madrasa : तुमकूरू (कर्नाटक) येथे मौलवीचा अत्याचार सहन न झाल्याने मदरशातील २४ मुले पळाली !

तुमकूरू (कर्नाटक) – येथील मदरशात मौलवीच्या सततच्या छळाला कंटाळून तेथून पळून आलेली २४ मुसलमान मुले बेंगळुरू रेल्वे स्थानकावर सापडली. बिहारमधून ही मुले तुमकूरू येथील अमलापूर येथील ‘जामिया अरेबिया हसीनिया ट्रस्ट’ मदरशात शिकण्यासाठी आली होती. मौलवीच्या विरोधात बाल न्याय कायदा आणि बालमजुरी प्रतिबंधक कायद्यांतर्गत गुन्हा नोंदवण्यात आला आहे. पोलीस या घटनेचे अन्वेषण करत आहेत.

संशयास्पदरित्या फिरणार्‍या या मुलांना पाहून रेल्वे सुरक्षा दलाने त्यांची चौकशी केली असता धक्कादायक माहिती समोर आली. मदरशाचा मौलवी इतका क्रूर होता की, तो शिकायला आलेल्या मुलांकडून दगड वाहून नेण्याची कामे करून घेत असे, असा आरोप मुलांनी केला आहे. प्रतिदिन दगड-माती वाहायला लावली जात असे. काम करायला नकार दिल्यास मौलवी त्यांना बेदम मारहाण करून त्यांचा छळ करत असे. अनेकदा मुलांना नीट जेवणही दिले जात नव्हते, असाही आरोप आहे. शारीरिक अत्याचार, छळ आणि सक्तीच्या मजुरी यांना कंटाळून शेवटी ही मुले तिथून पळून आली.