नसरापूर येथील पीडितेला न्याय मिळवण्यासाठी आज पुणे येथे मेणबत्ती मोर्चा !

पुणे – नसरापूर परिसरात १ मे या दिवशी ६५ वर्षीय भीमराव कांबळे याने ४ वर्षीय बालिकेवर अत्याचार करून तिची हत्या केली होती. या अमानवीय अत्याचाराच्या निषेधार्थ १० मे या दिवशी एका शांततामय मेणबत्ती मोर्चाचे आयोजन करण्यात आले आहे. निषेध नोंदवणे, खटला जलद गती न्यायालयात चालवून आरोपीस फाशीची शिक्षा होण्याची मागणी करणे आणि पीडितेला न्याय मिळवून देणे यांसाठी ‘समस्त पुणेकर नागरिक’ अन् विविध सामाजिक संस्था यांच्या वतीने मोर्चाचे आयोजन करण्यात आले आहे. हा मोर्चा सायंकाळी ६ वाजता बालगंधर्व चौक येथून चालू होईल आणि डेक्कन येथील ‘सावरकर स्मारक’ येथे त्याची सांगता होईल. समाजातील सर्व स्तरांतील नागरिकांनी मोर्चात मोठ्या संख्येने सहभागी व्हावे, असे आवाहन येथील पत्रकार परिषदेत आयोजकांनी केले. या वेळी हिंदुत्वनिष्ठ लेखिका सौ. शेफाली वैद्य अन्य मान्यवरांसह उपस्थित होत्या.