आमदार रोहित पवार यांचे आवेदन; गुणवत्तेवर निर्णय घेण्याची ईडीची मागणी !

मुंबई – महाराष्ट्र राज्य सहकारी बँक (एम्.एस्.सी.बी.) घोटाळ्याशी संबंधित आर्थिक अपव्यवहार प्रकरणात शरद पवार पक्षाचे नेते आणि आमदार रोहित पवार यांनी प्रविष्ट केलेल्या दोषमुक्तीच्या आवेदनावर अंमलबजावणी संचालनालयाने (ईडीने) ‘या प्रकरणाचा निर्णय केवळ तांत्रिक सूत्रांवर न घेता प्रकरणाच्या गुणवत्तेच्या आधारे घ्यावा’, अशी मागणी विशेष सत्र न्यायालयात केली.

बारामती ॲग्रो आणि साखर कारखाना व्यवहारावर संशय !

‘ईडी’च्या आरोपांनुसार कन्नड सहकारी साखर कारखान्याच्या लिलाव प्रक्रियेत मोठी अनियमितता झाली आहे. कारखान्यावर ८० कोटी ५६ लाख रुपयांचे कर्ज थकित होते. शिखर बँकेने लिलावाच्या वेळी कारखान्याचे मूल्य जाणीवपूर्वक अल्प दाखवले आणि आामदार रोहित पवार यांच्या ‘बारामती ॲग्रो लिमिटेड’शी संबंधित संस्थेला झुकते माप दिले, असा आरोप अन्वेषण यंत्रणेने केला. बोली प्रक्रियेत सहभागी झालेल्या सक्षम बोलीदारांना तांत्रिक कारणांवरून अपात्र ठरवून हा व्यवहार संशयास्पदरितीने पूर्ण केल्याचे ‘ईडी’चे म्हणणे आहे. दुसर्‍या बोलीदाराचा ‘बारामती ॲग्रो लिमिटेड’शी संबंध असल्याचा आरोप आहे, तसेच त्या बोलीदाराकडे साखर कारखाना चालवण्याचा अनुभव किंवा आर्थिक क्षमता नसल्याचेही ‘ईडी’ने सांगितले.