बँक फसवणूक प्रकरणात काँग्रेसचे आमदार राजेंद्र भारती यांना ३ वर्षांचा कारावास

भोपाळ (मध्यप्रदेश) – दतिया येथील काँग्रेसचे आमदार राजेंद्र भारती यांना देहलीतील खासदार-आमदार न्यायालयाने ३ वर्षांच्या कारावासाची शिक्षा सुनावली आहे. तसेच त्यांना १ लाख रुपयांचा दंडही ठोठावला आहे. त्यांना तिहार कारागृहात पाठवण्यात आले आहे. बँकेत मुदत ठेव चुकीच्या पद्धतीने वाढवून घेण्याचा त्यांच्यावर आरोप होता.

१. राजेंद्र भारती यांच्या आईच्या नावावर १० लाख ५० सहस्र रुपयांची मुदत ठेव दतिया जिल्हा सहकारी ग्रामीण विकास बँकेत होती. या ठेवीवर १३.५० टक्के व्याजदर मिळत होता.

२. ही ठेव ३ वर्षांवरून १५ वर्षांपर्यंत वाढवण्यात आली होती. या प्रकरणी बँकेतील कर्मचारी नरेंद्र सिंह यांनी तक्रार नोंदवली होती. त्यानंतर झालेल्या सुनावणीत खासदार-आमदार न्यायालयाने त्यांना दोषी ठरवत ३ वर्षांच्या कारावासाची शिक्षा सुनावली.

३. दतिया येथील आमदार राजेंद्र भारती हे काँग्रेसचे प्रभावी नेते मानले जातात. त्यांनी मागील मध्यप्रदेश विधानसभा निवडणुकीत भाजपचे वरिष्ठ नेते आणि माजी गृहमंत्री नरोत्तम मिश्रा यांचा पराभव केला होता. ते तिसर्‍यांदा आमदार म्हणून निवडून आले होते.