हनुमंताने ध्यान केले अंतरी रामाचे अन् कार्य केले देहाने रामाचे ।

‘रामनाथी (गोवा) येथील सनातनच्या आश्रमात साधक नामजपादी उपाय करतात, त्या खोलीत मारुतिरायाचे चित्र आणि सच्चिदानंद परब्रह्म डॉ. आठवले यांचे छायाचित्र ठेवले आहे. त्याकडे पाहून मला पुढील काव्य सुचले.

सांग ना रे बालहनुमंता । काय केलेस तू ? ।।
धैर्य कसे या बालकास । घेण्या निघाला सूर्याचा ग्रास ।। १ ।।

सांग ना रे पवनसुता । काय केलेस तू ? ।।
बुद्धी किती श्रेष्ठ तुझी । गेला ओळख पटविण्या रामाची ।। २ ।।

सांग ना रे अंजनीसुता । काय केलेस तू ? ।।
सीतामातेला शोधण्यासी । गेलास उल्लंघूनी समुद्रासी ।। ३ ।।

सांग ना रे मारुतिराया । काय केलेस तू ? ।।
राक्षसासी निर्दालण्या सदा । प्रहारसी प्रचंड गदा ।। ४ ।।

सांग ना रे केसरीनंदना । काय केलेस तू ? ।।
आत्मविश्वास केवढा तुला । पेटविलेस त्या सुवर्णलंकेला ।। ५ ।।

सांग ना रे बजरंगबली । काय केलेस तू ? ।।
काय वर्णावी तुझी शक्ती । औषधासाठी उचलला पर्वत ।। ६ ।।

हनुमंत म्हणे, 

‘सांगतो मी गुपित तुला । काय केले मी ? ।।
मी झालो रामाचा दास । अन् हृदयी बसविले रामास ।। ७ ।।

मुखी घेतले नाम रामाचे । ध्यान केले अंतरी रामाचे ।।
कार्य केले देहाने रामाचे । रामरूप झाले या चिरंजीवाचे’ ।। ८ ।।

– सौ. अंजली अजय जोशी, ढवळी, फोंडा, गोवा.

(२९.४.२०२५)