धार्मिक कार्यक्रमात ‘डीजे’वर बंदी घालण्याचा कर्नाटक सरकारचा विचार !

बेंगळुरू (कर्नाटक) – सार्वजनिक ठिकाणी शांतता राखण्यासाठी आणि ध्वनीप्रदूषण रोखण्यासाठी राज्यातील काँग्रेस सरकार विविध सांस्कृतिक आणि धार्मिक कार्यक्रमांमधील ‘डीजे’च्या (मोठ्या ध्वनीक्षेपक यंत्रणेच्या) वापरावर पूर्णपणे बंदी घालण्याविषयी गंभीरपणे विचार करत आहे. कन्नड आणि संस्कृती मंत्री शिवराज टांगडगी यांनी विधानसभेत ही माहिती दिली. (केवळ सांस्कृतिक आणि धार्मिक कार्यक्रमांमध्येच नाही, तर इतर सर्वच सार्वजनिक ठिकाणी ‘डीजे’वर बंदी घालणे अपेक्षित आहे ! – संपादक)

कामगारमंत्री संतोष लाड यांनी हा विषय मांडला. ते म्हणाले, ‘सर्व सण-उत्सवांच्या वेळी ‘डीजे’ ही एक मोठी समस्या बनली आहे. कुठल्याही मिरवणुकीत ‘डीजे’विना आमचे देव पुढे सरकतच नाहीत, ही अत्यंत लाजीरवाणी गोष्ट आहे.’ (काँग्रेसच्या मंत्र्यांना ‘डीजे’ विषयी नाही, तर हिंदूंच्या देवतांविषयी खरी समस्या आहे, हेच यातून दिसून येते ! – संपादक)