‘ऐकणे’ किंवा ‘ऐकण्याची वृत्ती’ ही साधकाची सर्वांत मोठी शक्ती आहे !

श्रीसत्‌शक्ति (सौ.) बिंदा सिंगबाळ यांच्या दैवी वाणीतून भक्तीसत्संगात स्रवलेले अमृतबिंदू !

१. ‘ऐकण्याची वृत्ती’ ही साधकाची सर्वांत मोठी शक्ती असणे

विविध सत्संग, बैठका, व्यष्टी आढावे, कार्य आढावे यांमध्ये सांगितली जाणारी सूत्रे ‘ऐकणे आणि त्यानुसार कृती करणे’ महत्त्वाचे ठरते; कारण ‘ऐकणे’ किंवा ‘ऐकण्याची वृत्ती’ ही साधकाची सर्वांत मोठी शक्ती आहे. या शक्तीच्या बळावर साधकाला अध्यात्माच्या मार्गावर चालणे सोपे होते.

२. ऐकण्याच्या वृत्तीमुळे दाखवलेला मार्ग आत्मसात करता येतो !

साधनेत ‘विचारणे’ या सूत्रासह ‘ऐकण्याचे’ही तितकेच महत्त्व आहे. अडचणी किंवा शंका विचारल्यामुळे आपल्याला दिशा मिळते, तर सांगितलेले ऐकल्यामुळे दाखवलेला मार्ग किंवा दिशा आत्मसात् करता येते.

३. गुरूंनी सांगितलेले मनापासून ऐकण्याचे महत्त्व

गुरु किंवा संत यांनी सांगितलेले मनापासून ऐकले आणि ते कृतीत आणले, तर त्यांचे शब्द हे केवळ शब्द न रहाता ‘दिव्य मंत्र’ बनतात आणि आपल्या जीवनात आमूलाग्र पालट करतात.

४. ऐकल्यामुळे आपले गुरूंशी असलेले नाते अधिक दृढ होते !

ईश्वर, गुरु, संत या सर्वांशी नाते दृढ करण्यासाठी ‘ऐकणे’ हा सर्वोत्तम सेतू (पूल) आहे. जसे आपले ऐकणारा जीव आपल्याला जवळचा वाटतो, तसेच गुरूंचे ऐकणारा जीव त्यांच्या अधिक स्मरणात रहातो. त्यामुळे ऐकण्याच्या माध्यमातून आपले गुरूंशी असलेले नाते आपोआपच दृढ होते.

५. ‘ऐकणे’ म्हणजे गुरुकृपेचा मार्ग

गुरु अथवा त्यांचे समष्टी रूप असलेले संत, उत्तरदायी साधक आणि सहसाधक यांनी सांगितलेले ऐकून लगेच कृतीत आणले, तर साधकावर गुरूंची भरभरून कृपा होते.

६. गुरूंच्या एका वाक्यात संपूर्ण साधनेचा मार्ग दडलेला असणे

मोक्षगुरु सच्चिदानंद परब्रह्म गुरुदेव साधकांना ‘सनातन प्रभात’ नियतकालिके आणि ग्रंथ यांच्या माध्यमातून सातत्याने मार्गदर्शन करत असतात. श्री गुरूंनी साधकांना केलेले हे मार्गदर्शन म्हणजे यशस्वी जीवनासाठी दिशादर्शनच होय. गुरूंच्या एका वाक्यात संपूर्ण साधनेचा मार्ग दडलेला असतो. त्यांनी सांगितलेले जो ऐकतो, त्यालाच तो मार्ग गवसतो.