पंजाबमधील पोलीस अधिकारी आणि सैनिक यांच्या हत्येचे दायित्व ‘तहरीक-ए-तालिबान हिंदुस्थान’ने स्वीकारले !

गुरदासपूर (पंजाब) – येथील भारत-पाक सीमेवरील अधिया गावातील तपासणी चौकीत अज्ञातांकडून रात्री गोळीबार करून पोलीस अधिकारी आणि गृहरक्षक दलाचा सैनिक यांची २ दिवसांपूर्वी हत्या करण्यात आली होती. याचे अन्वेषण पोलिसांकडून चालू असतांनाच ‘तहरीक-ए-तालिबान हिंदुस्थान’ या संघटनेने हत्येचे दायित्व स्वीकारल्याचा दावा करणारी पत्रके सामाजिक माध्यमांतून प्रसारित झाली आहे. या पोस्टमध्ये संघटनेचा ध्वज, चिन्ह आणि दोन्ही मृतांची छायाचित्रे प्रसारित करण्यात आली आहेत. ही माहिती हिंदी आणि इंग्रजी या दोन्ही भाषांत प्रसारित करण्यात आली आहे. पोलीस या दाव्यांची सत्यता पडताळत असून प्राथमिक स्तरावर ही अपरिचित संघटना असल्याचे सांगत आहेत.