पोलिसांच्या अन्वेषणातून सत्य बाहेर येईल ! – संदीप गिल, पोलीस अधीक्षक

• भिगवण (पुणे) येथील हिंदु मुलीचे अपहरण प्रकरण !
  

• दोन्ही आमदार लव्ह जिहादच्या आरोपावर ठाम

पुणे – इंदापूर तालुक्यातील भिगवण येथील हिंदु तरुणीच्या अपहरण प्रकरणातील संबंधित तरुणी तरुणासह मध्यरात्री बारामती शहर पोलीस ठाण्यात उपस्थित झाली. त्यांना कह्यात घेऊन पोलिसांकडून पुढील प्रक्रिया चालू आहे. याची माहिती तरुणीच्या आई-वडिलांना मिळताच ते पोलीस ठाण्यात उपस्थित झाले; परंतु तरुणीने आईसमवेत जाण्यास नकार दिल्याचे समोर येत आहे. या प्रकरणाची माहिती प्रसारमाध्यमांसमोर पुणे ग्रामीण पोलीस अधीक्षक संदीप गिल यांनी पत्रकार परिषदेत दिली. राष्ट्रवादीचे आमदार संग्राम जगताप आणि भाजपचे आमदार गोपीचंद पडळकर यांनी हे लव्ह जिहादचे प्रकरण असल्याचा पुनरुच्चार केला.

अधीक्षक गिल म्हणाले, ‘‘या प्रकरणात गुन्हा नोंद करण्यात आला असून सर्व बाजूंनी अन्वेषण करण्यात येत आहे. तरुणीने न्यायालयासमोर, तसेच तिच्या कुटुंबियांसमोर तिचे म्हणणे मांडले आहे. कुटुंबियांनी वेगळे आरोप केल्यामुळे पोलिसांकडून अधिक अन्वेषण चालू आहे.’’ तरुणीने आईकडे जाण्यास नकार दिला आहे. तिला कुणाकडे जायचे, हे तिला विचारले जाईल. अन्यथा मुलींच्या वसतिगृहात तिला ठेवले जाईल. मुलीच्या आईची तिची भेट झालेली आहे. गुन्हा नोंद झाल्यापासून पोलीस पुरावे गोळा करत आहेत. अन्वेषण पूर्ण झाल्यानंतर सत्य बाहेर येईल, असेही गिल यांनी सांगितले.

मुलीच्या आईने प्रसारमाध्यमांपुढे सांगितले की, मुलगी त्या गुंड मुलाकडे दिल्यास त्या स्वत: आत्महत्या करतील.