सनातन प्रभात > Post Type > बातम्या > आंतरराष्ट्रीय बातम्या > बांगलादेश : इस्कॉनचे कारागृहात असलेले चिन्मय प्रभु यांच्या जिवाला गंभीर धोका !

बांगलादेश : इस्कॉनचे कारागृहात असलेले चिन्मय प्रभु यांच्या जिवाला गंभीर धोका !

बांगलादेशातील अल्पसंख्यांक हिंदूंमध्ये जागृती केल्यावरून दीड वर्षापासून कारागृहात

चिन्मय कृष्ण दास प्रभु

ढाका (बांगलादेश) – ‘इस्कॉन’ या आध्यात्मिक संस्थेचे नेते आणि बांगलादेशातील प्रखर हिंदुत्वनिष्ठ चिन्मय कृष्ण दास प्रभु यांच्या जिवाला गंभीर धोका निर्माण झाला आहे, अशी माहिती इस्कॉनचे भारतातील नेते श्री. राधारमण दास यांनी ‘एक्स’वरून दिली.

ते म्हणाले,

‘‘चिन्मय प्रभु यांच्या मातोश्रींशी मी काही दिवसांपूर्वीच संवाद साधला. स्वतःच्या मुलाविषयी बोलतांना त्या भावूक होऊन रडू लागल्या. चिन्मय दास ५८३ दिवसांहून अधिक काळ कारागृहात आहेत. शेवटच्या भेटीच्या वेळी त्यांची प्रकृती अत्यंत खालावलेली होती, असे त्यांच्या आईने सांगितले.’’

दास पुढे म्हणाले की, चिन्मय प्रभु यांना तातडीने प्रगत वैद्यकीय उपचारांसाठी परदेशात नेले नाही, तर त्यांच्या जिवाला गंभीर धोका निर्माण होऊ शकतो. दास यांनी पंतप्रधान मोदी यांना उद्देशून विनंती केली की, त्यांनी यात हस्तक्षेप करावा आणि चिन्मय प्रभु यांना तातडीच्या वैद्यकीय उपचारांसाठी सिंगापूरला पाठवले जावे.

दास यांनी माहिती दिली की, चिन्मय प्रभु यांच्या मातोश्रींना नुकताच हृदयविकाराचा तीव्र झटका आला असून त्यांना तातडीने रुग्णालयात नेले आहे. कृपया त्यांच्यासाठीही प्रार्थना करा.

संपादकीय भूमिका

हिंदु धर्माने संन्यासाला सर्वाेच्च आदराचे स्थान दिले आहे. अशात चिन्मय कृष्ण दास प्रभु यांसारखे संन्यासी हिंदूंमध्ये जागृतीही करत आहेत. त्यामुळे त्यांच्या रक्षणासाठी आता बांगलादेशासह भारतातील हिंदूंनी व्यापक आवाज उठवून सरकारांवर दबाव आणला पाहिजे !

नूतन लेख