Delhi Blast : लाल किल्ल्याजवळील बाँबस्फोटामागे ‘अंसार अंतरिम’ नावाची एक नवीन आतंकवादी संघटना

नवी देहली – गेल्या वर्षी देहलीतील लाल किल्याजवळ झालेला भीषण बाँबस्फोट एका मोठ्या देशव्यापी षड्यंत्राचा भाग असून त्यामागे ‘व्हाईट कॉलर’ आतंकवादी मॉड्यूलचा ( यात आतंकवादी सामान्य माणसांप्रमाणे लोकांमध्ये रहातात आणि गर्दीच्या ठिकाणी आक्रमणे करून पळून जातात) हात असल्याचे स्पष्ट झाले आहे. सुशिक्षित आणि व्यावसायिक पार्श्वभूमी असलेल्या डॉक्टरांनी एकत्र येऊन जम्मू-काश्मीरसह देशातील प्रमुख शहरांमध्ये विध्वंसक कारवाया करण्यासाठी ‘अंसार अंतरिम’ नावाची एक नवीन आतंकवादी संघटना उभी केली होती. या मॉड्यूलचा मुख्य सूत्रधार पुलवामा येथील डॉ. उमर-उन-नबी असल्याचे निष्पन्न झाले आहे.

१. उमरनेच १० नोव्हेंबर २०२५ या दिवशी लाल किल्ल्याबाहेर स्फोटकांनी भरलेल्या चारचाकीचा स्फोट घडवून आणला होता, ज्यामध्ये १० निरपराध नागरिकांना जीव गमवावा लागला होता. उमर वर्ष २०१६ पासून कट्टरतावादी विचारसरणीने प्रेरित झाला होता आणि त्याने यापूर्वी दोनदा आतंकवादी गटात सहभागी होण्याचा प्रयत्न केला होता.

२. एप्रिल २०२२ मध्ये श्रीनगरमध्ये झालेल्या एका गुप्त बैठकीत या कटाची बीजे रोवली गेली होती. या बैठकीत मुझम्मिल गनी, उमर-उन-नबी, आदिल राथेर आणि मौलवी इरफान यांसारख्या संशयितांनी ‘अंसार अंतरिम’ स्थापन करण्याचा निर्णय घेतला. यामध्ये आदिलची ‘अमीर’ म्हणजेच प्रमुख म्हणून, तर इरफानची उपप्रमुख आणि मुझम्मिल गनी याची कोषाध्यक्ष म्हणून नियुक्ती करण्यात आली होती.

३. जुन्या आतंकवादी संघटनांशी संपर्क तुटल्यामुळे या शिक्षित तरुणांनी स्वतःचे नवीन मॉड्यूल बनवले होते. अल्-कायदाशी संबंधित असलेल्या ‘अंसार’ या शब्दाचा वापर करून त्यांनी दहशत पसरवण्याचा प्रयत्न केला होता.