Australia Gandhi Statue : मेलबर्न (ऑस्ट्रेलिया) येथे मोहनदास गांधी यांच्या ४२६ किलो वजनाच्या मूर्तीची दिवसाढवळ्या चोरी

भारताने नोंदवला निषेध

मेलबर्न (ऑस्ट्रेलिया) – येथील रोव्हविल परिसरातील ‘ऑस्ट्रेलियन इंडियन कम्युनिटी सेंटर’मधून मोहनदास गांधी यांची ४२६ किलो वजनाची कांस्य मूर्ती चोरीस गेली आहे. भरदिवसा ही चोरी करण्यात आली. भारतीय परराष्ट्र मंत्रालयाचे प्रवक्ते रणधीर जयस्वाल यांनी या घटनेचा तीव्र निषेध केला आहे. दोषींना तातडीने अटक करून मूर्ती परत मिळवावी, अशी मागणी त्यांनी ऑस्ट्रेलियाच्या अधिकार्‍यांकडे केली आहे.

१. ही घटना २ फेब्रुवारीला दुपारी घडली. चेहरा झाकलेले ३ जण पांढर्‍या रंगाच्या व्हॅनमधून आले होते. त्यांनी विद्युतचालित एंगल ग्राइंडरचा वापर करून मूर्ती चौथर्‍यापासून  तोडली आणि मूर्ती ते घेऊन गेले.

२. १२ नोव्हेंबर २०२१ या दिवशी भारत सरकारकडून ‘भारतीय सांस्कृतिक संबंध परिषद’ या संस्थेच्या माध्यमातून ही मूर्ती ऑस्ट्रेलियाला भेट देण्यात आली होती. त्या वेळी ऑस्ट्रेलियाचे तत्कालीन पंतप्रधान स्कॉट मॉरिसन यांनी ती शांतता आणि अहिंसेचे प्रतीक म्हणून स्वीकारली होती.