Indian Fishermen Arrest : श्रीलंकेच्या नौदलाने ३ भारतीय मासेमारांना घेतले कह्यात : नौकाही केली जप्त !

रामेश्वरम् (तमिळनाडू) – श्रीलंकेच्या नौदलाने नुकतेच ३ भारतीय मासेमारांना कह्यात घेतले आणि त्यांची नौकाही जप्त केली. या कारवाईमुळे तमिळनाडूतील रामेश्वरम् येथील मासेमार संतप्त झाले आहेत. रामेश्वरम् मत्स्य विभागानुसार अटक झालेल्यांची नावे रूबन, नागराजन आणि प्रभु अशी आहेत.

नेदुनथीवूच्या जवळ मासेमारी करत असतांना श्रीलंका नौदलाच्या गस्ती पथकाने त्यांना थांबवून कह्यात घेतले. त्यांची नौका जप्त करून उत्तरेकडील कराईनगर नौदल तळावर नेण्यात आली. भारतीय मासेमार प्रतिनिधींच्या माहितीनुसार गेल्या १५ दिवसांतील ३ घटनांमध्ये श्रीलंका नौदलाने १३ मासेमारांना अटक केली असून ३ नौका जप्त केल्या आहेत. रामेश्वरम् येथील मासेमार संघटनेचे नेते व्ही.पी. जेसु राजा यांनी सांगितले की, वारंवार होणार्‍या अटकसत्रांमुळे मासेमार त्रस्त झाले आहेत. भारत आणि श्रीलंका सरकारांनी उच्चस्तरीय चर्चेतून यावर स्थायी तोडगा काढावा, अशी मागणी त्यांनी केली आहे.