Lieutenant Col Deepak Sharma : संरक्षण मंत्रालयातील अधिकारी लेफ्टनंट कर्नल दीपक कुमार शर्मा यांना लाचखोरीच्या प्रकरणी अटक

नवी देहली – संरक्षण मंत्रालयाच्या अंतर्गत येणार्‍या आंतरराष्ट्रीय सहयोग आणि निर्यात प्रकरणांशी संबंधित उप नियोजन अधिकारी म्हणून कार्यरत असणारे लेफ्टनंट कर्नल दीपक कुमार शर्मा यांना लाच घेतल्याच्या आरोपाखाली केंद्रीय अन्वेषण विभागाने अटक केली. बेंगळुरूमधील आस्थापनाकडून ३ लाख रुपयांची लाच घेतल्याचा त्यांच्यावर आरोप आहे. शर्मा यांच्या घराची झडती घेतली असता तिथे २ कोटी २३ लाख रुपयांची रोकड आढळून आली. या प्रकरणात त्यांची पत्नी कर्नल काजल बाली यांच्या विरोधातही गुन्हा नोंदवण्यात आला आहे. कर्नल बाली या सध्या राजस्थानच्या श्री गंगानगर येथील १६ इन्फंट्री डिव्हिजन ऑर्डिनन्स युनिटमध्ये कमांडिंग ऑफिसर म्हणून तैनात आहेत. त्यांच्या श्रीगंगानगर येथील  निवासस्थानाहून १० लाख रुपये जप्त करण्यात आले आहेत.

🪖 Betrayal of the Uniform: Army Couple Booked for Corruption 🪖

A Defence Ministry officer, Lieutenant Colonel Deepak Kumar Sharma, has been arrested in a bribery case.

💰 ₹2.23 crore cash recovered from his residence.

A case is also registered against his wife, Colonel… pic.twitter.com/f2OW9Bu5F5

— Sanatan Prabhat (@SanatanPrabhat) December 21, 2025

केंद्रीय अन्वेषण विभागाच्या प्रवक्त्यांनी दिलेल्या माहितीनुसार लेफ्टनंट कर्नल शर्मा हे संरक्षण उत्पादनांचे निर्माण आणि निर्यात यांच्याशी जोडल्या गेलेल्या अनेक खासगी आस्थापनांशी संगनमत करून फौजदारी गुन्ह्यांशी संबंधित कारवायांमध्ये गुंतले होते.

आस्थापनांना लाभ मिळवून देण्याच्या बदल्यात शर्मा यांनी रोख रक्कम घेतली होती. राजीव यादव आणि रवजीत सिंह नावाचे २ व्यक्ती लेफ्टनंट कर्नल दीपक कुमार शर्मा यांच्या नियमित संपर्कात होते. त्यांच्या आस्थापनाला लाभ मिळण्यासाठी ते अवैध मार्गांचा वापर करत होते. १८ डिसेंबर २०२५ या दिवशी या आस्थापनाच्या सांगण्यावरून विनोद कुमार नामक व्यक्तीने दीपक कुमार शर्मा यांना ३ लाख रुपयांची लाच दिली.