गोव्यातून सुमारे ५ सहस्र वारकर्‍यांचे पंढरपूरच्या दिशेने प्रस्थान

कशी असतात वारी पथके ?

मुळगाव, डिचोली येथील वारीला नवसंजीवनी देणारे उदय बुवा फडके वारी पथकाविषयी माध्यमाकडे माहिती देतांना म्हणाले, ‘‘आम्ही वर्ष २००८ मध्ये ५३ पुरुष भाविकांनी पंढरपूर येथे वारीला जाण्यास प्रारंभ केला आणि आज एका पथकातील संख्या १२५ आहे. वारीला जातांना सुरक्षेच्या कारणास्तव पथकातील सदस्यांची संख्या आम्ही मर्यादित ठेवली आहे. पथकासोबत जेवण बनवणारा एक गट असतो आणि पथकाच्या मागे आपत्कालीन परिस्थिती उद्भवल्यास ती हाताळण्यासाठी २ चारचाकी वाहने (सोबत प्रथमोपचार पेटी असते) असतात. पथक रात्री ज्या ठिकाणी थांबते त्या ठिकाणी पथकातील सदस्यांचे सामान ठेवणे आणि पुन्हा सामान घेणे याचे दायित्व २ सदस्यांना दिलेले असते. प्रतिदिन आम्ही न्यूनतम ३० कि.मी.चा पायी प्रवास करत असतो. पथकामध्ये ६० वर्षांहून अधिक वयोगटातील अनेक सदस्य आहेत. दिंडीमध्ये एका वाहनामध्ये श्री विठ्ठल-रखुमाई देवतेची प्रतिमा ठेवलेली असते. या वाहनाच्या पुढे काहीजण डोक्यावर तुळशी वृंदावन, तर काही जण हातात वीणा घेऊन चालत असतात. वारीचे आयोजन करणे सोपे नसते; मात्र श्री विठ्ठलच सर्व काही करत असतो आणि वाटेतील अडचणी तोच सोडवत असतो.’’