सनातन प्रभात > Post Type > बातम्या > राष्ट्रीय बातम्या > Tejas Jets Deal : भारतीय वायूदल ९७ नवीन तेजस विमाने खरेदी करणार

Tejas Jets Deal : भारतीय वायूदल ९७ नवीन तेजस विमाने खरेदी करणार

‘हिंदुस्तान एअरोनॉटिकल्स लिमिटेड’समवेत ६६ सहस्र कोटी रुपयांचा करार

‘तेजस मार्क-१ ए’ लढाऊ विमान

नवी देहली – भारतीय वायूदलाने ‘हिंदुस्तान एअरोनॉटिकल्स लिमिटेड’ (एच्.ए.एल्.) आस्थापनाकडून ९७ ‘तेजस मार्क-१ ए’ लढाऊ विमाने खरेदी करण्याचा करार केला आहे. हा करार ६६ सहस्र ५०० कोटी रुपयांचा असून वायूदलाने आतापर्यंत केलेला हा सर्वांत मोठा व्यवहार आहे.

१. वायूदलाकडे असलेली ३६ जुनी ‘मिग २१’ विमाने सेवेतून निवृत्त होत आहेत. त्यामुळे निर्माण झालेली लढाऊ विमानांची तूट भरून काढण्यासाठी हा करार करण्यात आला असल्याचे म्हटले जात आहे. एअर मार्शल ए.पी. सिंह यांनी अलीकडेच ‘भारतीय वायूदल लढाऊ विमानांच्या संदर्भात कमकुवत स्थितीत आहे. वायूदलाला प्रतिवर्षी ४० नव्या लढाऊ विमानांची आवश्यकता आहे’, असे म्हटले होते.

२. सध्या भारताकडे केवळ २९ ‘फायटर स्क्वाड्रन्स’ (१७ ते १८ लढाऊ विमानांची एक तुकडी, याप्रमाणे २९ तुकड्या) आहेत. चीन किंवा पाकिस्तानचा कुठल्याही प्रकारचा धोका निर्माण झाल्यास भारताला ४२ ‘स्क्वाड्रन्स’ही पुरेसे नाहीत. त्यामुळे अधिकाधिक लढाऊ विमाने मिळावीत, ही मागणी वायूदलाने सातत्याने लावून धरली आहे. ही मागणी आता काही अंशी पूर्ण होणार आहे.

३. यापूर्वी फेब्रुवारी २०२१ मध्ये ४६ सहस्र ९८९ कोटी रुपयांमध्ये ८३ ‘तेजस मार्क-१ए’ विमानांच्या खरेदीचा व्यवहार झाला होता. त्यानुसार फेब्रुवारी २०२४ ते फेब्रुवारी २०२८ या काळात एच्.ए.एल्.कडून वायूदलाला विमाने दिली जाणार आहेत. ‘या वर्षी ऑक्टोबर महिन्यापर्यंत भारतीय वायूदलाकडे २ तेजस विमाने सुपुर्द केली जातील’, असे एच्.ए.एल्.ने म्हटले आहे.

नूतन लेख