पितृपक्षानिमित्त ‘ॐ ॐ श्री गुरुदेव दत्त ॐ ।’ हा नामजप करण्यापूर्वी साधिकेला सूक्ष्मातून दिसलेले दृश्य आणि तिच्या लक्षात आलेले गुरुतत्त्वाचे सामर्थ्य !

‘७.९.२०२५ या दिवशी दैनिक ‘सनातन प्रभात’मध्ये ‘साधकांनी पितृपक्षानिमित्त ‘ॐ ॐ श्री गुरुदेव दत्त ॐ ।’ हा नामजप प्रतिदिन १ घंटा करावा’, असे प्रसिद्ध झाले होते. त्यानुसार साधिका नामजप करत असतांना तिला सूक्ष्मातून दिसलेल्या दृश्याविषयी पुढे दिले आहे.  

१. ‘८.९.२०२५ या दिवशी पितृपक्ष चालू झाला. त्या दिवशी मी ‘ॐ ॐ श्री गुरुदेव दत्त ॐ ।’ हा नामजप करण्यापूर्वी दत्तगुरूंना प्रार्थना करायला आरंभ केला. तेव्हा मला सूक्ष्मातून माझे आई-बाबा दिसले.

२. मला सूक्ष्मातून दिसले, ‘आईने जी साडी नेसलेली मला आवडत असे, तीच साडी आई नेसली आहे. आई-बाबा दोघेही पुष्कळ आनंदी आणि समाधानी आहेत.

३. मी त्यांना प्रथम भावपूर्ण नमस्कार केला. मी काही बोलण्यापूर्वीच आई म्हणाली, ‘आम्ही तुला आशीर्वाद द्यायला आलो आहोत. कुळातील एक व्यक्ती जरी साधना करत असली, तरीही संपूर्ण कुळाचा उद्धार होतो. ‘तू साधना करत आहेस’, हे पाहून आम्ही पुष्कळ समाधानी आहोत आणि आम्हाला कृतज्ञता वाटते.’ नंतर ते दोघे दिसेनासे झाले.

४. हे सगळे अनुभवल्यावर ‘गुरुतत्त्व प्रत्येक क्षणी आपली किती काळजी घेते ! गुरुतत्त्व केवळ आपलीच नाही तर संपूर्ण कुटुंब आणि कूळ यांची काळजी घेते’, हे पाहून माझ्या मनात गुरुदेवांप्रती (परात्पर गुरु डॉ. आठवले यांच्याप्रती) पुष्कळ कृतज्ञता दाटून आली.’

– कु. रजनीगंधा कुर्‍हे, सनातन आश्रम, रामनाथी, गोवा. (१२.९.२०२५)