Australia Protests : ऑस्ट्रेलियात भारतीय स्थलांतरितांच्या विरोधात २० शहरांमध्ये मोर्चा !

ऑस्ट्रेलियाच्या पंतप्रधानांनी मोर्चाचा केला निषेध

सिडनी (ऑस्ट्रेलिया) – देशातील २० शहरांमध्ये भारतीय स्थलांतिरांच्या विरोधात मोर्चा काढण्यात आला. ‘भारतीय स्थलांतरितांमुळे ऑस्ट्रेलियात बेरोजगारी वाढत आहे’, असा अजब दावा आंदोलनकर्त्यांनी केला आहे. ब्रिटननंतर भारतीय लोक ऑस्ट्रेलियातील दुसर्‍या क्रमांकाचा सर्वांत मोठा स्थलांतरितांचा गट आहे. जून २०२३ पर्यंत ऑस्ट्रेलियामध्ये भारतीय वंशाचे ८ लाख ४ सहस्र रहिवासी होते. ऑस्ट्रेलियाची लोकसंख्या २ कोटी ७२ लाख एवढी आहे. ‘ऑस्ट्रेलियाच्या लोकसंख्येमध्ये भारतियांची एकूण संख्या केवळ ३.२ टक्के आहे. असे असतांनाही ऑस्ट्रेलियातील बेरोजगारी आणि वाढती महागाई यांस भारतियांना उत्तरदायी का ठरवले जाते ?’, असा प्रश्न भारतियांकडून उपस्थित केला जात आहे. अलीकडच्या काळात ऑस्ट्रेलियातील भारतियांवरील आक्रमणांचे प्रमाणही वाढले आहे.

१. ऑस्ट्रेलियातील सत्ताधारी आणि विरोधी राजकारणी तेथील भारतीय समुदायाच्या सकारात्मक योगदानाची स्वीकृती देतात.

२. असे असले, तरी देशातील श्वेतवर्णीय, कट्टर ख्रिस्ती आणि कडवे उजवे हे तेथील भारतियांना विरोध करत आहेत. ‘ऑस्ट्रेलियामध्ये ख्रिस्ती धर्माव्यतिरिक्त अन्य धर्मीय येऊ नयेत’, असे त्यांना वाटते.

३. ‘मार्च फॉर ऑस्ट्रेलिया’ या नावाने मोर्चा काढणार्‍या आयोजकांनी पत्रक प्रसारित केले आहे. त्यात म्हटले आहे की, मागील १०० वर्षांत ऑस्ट्रेलियात जेवढे ग्रीक आणि इटाली येथील नागरिक ऑस्ट्रेलियात आले नाहीत, तेवढे भारतीय नागरिक मागील ५ वर्षांत ऑस्ट्रेलियात आले आहेत.

४. ऑस्ट्रेलियातील भारतीय वंशाचे लोक हे सत्ताधारी लेबर पार्टीचे समर्थक आहेत. हा पक्ष सुधारणावदी आणि डाव्या विचारसरणीचा समजला जातो. त्यामुळे पुढील निवडणुकीत त्यांच्या मतांचा ऑस्ट्रेलियाच्या राजकारणावर परिणाम होऊ शकतो, असे तेथील उजव्या विचारसरणीच्या लोकांना वाटते.

५. ऑस्ट्रेलियात कट्टर उजव्या विचारसरणीचे लोक हे विरोधी लिबरल पक्षचे समर्थक आहेत. त्यामुळे ते भारतीय वंशाच्या नागरिकांना विरोध करतात.

आंदोलक ‘नवनाझी’ ! – अँथनी अल्बानीज, पंतप्रधान, ऑस्ट्रेलिया

(नवनाझी म्हणजे जर्मनीतील नाझींप्रमाणे कट्टर जातीवादी आणि क्रूर विचारसरणी असणारे लोक)

पंतप्रधान अँथनी अल्बानीज म्हणाले की, आंदोलन करणारे हे नवनाझी घटकांशी संबंधित आहेत. या निदर्शनात नवनाझी गट म्हणून ओळखल्या जाणार्‍या ‘नॅशनल सोशलिस्ट नेटवर्क’ या संघटनेचे सदस्य सहभागी झाले होते. सामाजिक माध्यमांवर एकाने पोस्ट करून निषेधाचे समर्थन करणारे लोक महिलाविरोधी, श्वेत वर्चस्ववादी, हवामान पालट नाकारणारे, तसेच ट्रम्प समर्थक असल्याचे म्हटले आहे.