France Heat Wave : फ्रान्समध्ये कडक उन्हाळ्यामुळे एसी खरेदी करण्यासाठी दुकानांमध्ये मोठी गर्दी  

पॅरिस (फ्रान्स) – युरोपमध्ये सध्या भीषण उष्णतेची लाट चालू आहे. तापमान ४० अंश सेल्सियसपेक्षा अधिक झाले आहे. आता फ्रान्सच्या रॉबेरी शहरात वातानुकूलित यंत्र (एसी – एअर कंडिशनर) विकत घेण्यासाठी गर्दी होत असल्याचा एक व्हिडिओ समोर आला आहे. या व्हिडिओमध्ये दिसते की, जसे दुकानाचे दार उघडले, तसे बाहेर थांबलेले लोक थेट आत पळू लागले. एसी आणि कुलर मिळवण्यासाठी ग्राहकांमध्ये अक्षरशः चढाओढ चालू झाली. काही वेळातच स्टोअरच्या आत मोठा गोंधळ उडाला. लोक एकमेकांना बाजूला सारून एसीचे बॉक्स उचलण्याचा प्रयत्न करत होते. या व्हिडिओवरून फ्रान्समधील उष्णतेची तीव्रता किती भयंकर आहे ?, याचा अंदाज लावता येतो.

युरोपमधील इतर देशांची स्थिती

केवळ फ्रान्सच नाही, तर ब्रिटन, इटली आणि स्पेन यांसारख्या युरोपातील इतर देशांनाही या उष्णतेच्या लाटेचा तीव्र फटका बसला आहे. या देशांमध्ये एरवी एवढी प्रदीर्घ आणि प्रखर उष्णता जाणवत नाही; मात्र जागतिक तापमानवाढीमुळे आता युरोपमधील जनजीवन विस्कळीत झाले असून नागरिकांसमोर थंडावा देणार्‍या उपकरणांचा आधार घेण्यावाचून दुसरा पर्याय नाही.