Modi To Visit China : पंतप्रधान मोदी ३१ ऑगस्टला चीनच्या दौर्‍यावर जाणार

‘शांघाय कॉऑपरेशन ऑर्गनायझेशन’च्या शिखर परिषदेला उपस्थित रहाणार

नवी देहली – पंतप्रधान नरेंद्र मोदी ३१ ऑगस्ट ते १ सप्टेंबर २०२५ या कालावधीत चीनच्या तियाँजिन शहरात होणार्‍या ‘शांघाय कॉऑपरेशन ऑर्गनायझेशन’च्या शिखर परिषदेच्या निमित्ताने चीनला भेट देतील. ही भेट वर्ष २०२० च्या गलवान खोर्‍यातील  संघर्षानंतरची त्यांची पहिली अधिकृत भेट असणार आहे. या भेटीला विशेष महत्त्व आहे; कारण चीन आणि भारत दोन्ही देश वर्ष २०२० नंतर संबंध सामान्य करण्याच्या मार्गावर आहेत. पंतप्रधान मोदी यांची ही भेट मुख्यतः शिखर परिषदेसाठी आहे; परंतु भारत-चीन संबंध, सीमा सुरक्षा, तसेच वाणिज्य, आंतरराष्ट्रीय सहकार्य आणि संवाद पुनरुज्जीवन यांवरही दोन्ही देशांमध्ये चर्चा अपेक्षित आहे.

या परिषदेत सदस्य राष्ट्रांच्या राष्ट्रनेत्यांसमवेत अनौपचारिक संवाद साधण्याची शक्यताही आहे. यात चीनचे राष्ट्राध्यक्ष शी जिनपिंग किंवा रशियाचे अध्यक्ष व्लादिमिर पुतिन याचा समावेश असू शकतो.