Karnataka Chennappa Narinal Murder : कर्नाटकात कोयत्याने वार करून एका व्यक्तीची हत्या !

बेंगळुरू (कर्नाटक) : राज्यातील कोप्पळ जिल्ह्यात एका बेकरीत झालेल्या हत्या प्रकरणाचे सीसीटीव्ही चित्रीकरण समोर आले आहे. यामध्ये चेनप्पा नरिनाल नावाच्या व्यक्तीला काही लोक कोयत्याने मारहाण करतांना दिसत आहेत. ही घटना ३१ मेच्या रात्री घडल्याचे पोलिसांनी सांगितले. मारहाणीत ३५ वर्षीय चेनप्पाचा मृत्यू झाला.

सीसीटीव्ही चित्रीकरणात दिसत आहे की, चेनप्पा नरिनाल हा ओरडत बेकरीत शिरतो आणि त्याचा पाठलाग करणारे काही लोक त्याला मारण्यासाठी तेथे येतात. २ व्यक्ती कोयत्याने, तर एक व्यक्ती लाकडी दांड्याने त्याच्या डोक्यावर प्रहार करत असल्याचे दिसत आहे. प्राण वाचवण्यासाठी बेकरीतून बाहेर पळाल्यावर अन्य दोघे-तिघे त्याला चाकूने भोसकतात.

या प्रकरणी पोलिसांनी ७ जणांना अटक केली असून रवि, प्रदीप, मंजुनाथ, नागराज, गौतम, प्रमोद अशी त्यांची नावे आहेत. वैमनस्य आणि संपत्ती यांच्या वादातून ही हत्या झाल्याचे समोर आले आहे.