योगतज्ञ दादाजी वैशंपायन यांनी परात्पर गुरु डॉ. आठवले यांच्यासाठी आणि स्वत:साठी केलेल्या अनुष्ठानातील संस्कारित साहित्य नदीमध्ये विसर्जन करण्यासाठी गेल्यावर साधकाला ७ तेजस्वी गोळ्यांच्या रूपात शक्तिदेवतेचे दर्शन होणे

१. योगतज्ञ दादाजी वैशंपायन यांनी अनुष्ठान केल्यानंतर पूजेतील संस्कारित साहित्य नदीमध्ये विसर्जन करण्यास सांगणे

‘वर्ष २०१५ मध्ये मी नाशिक येथे योगतज्ञ प.पू. दादाजी वैशंपायन यांच्या सेवेत होतो. तेव्हा एकदा योगतज्ञ दादाजी यांनी प.पू. डॉक्टरांसाठी आणि स्वत:साठी एक अनुष्ठान केले होते. अनुष्ठान झाल्यानंतर पूजेतील संस्कारित साहित्य विसर्जन करण्यासाठी त्यांनी मला एका साधकाच्या समवेत नाशिक येथील गोदावरी नदीच्या ठिकाणी जायला सांगितले. त्यांनी मला संस्कारित साहित्य विसर्जन करण्यापूर्वी ‘ॐ आनन्दं हिमालयं विष्णुं गरुडध्वजम् ॐ ।। ॐ शिवं दत्तं गायत्री सरस्वती महालक्ष्मी प्रणमाम्यहम् ॐ ।।’ ही सांप्रदायिक प्रार्थना ५ वेळा म्हणून ते साहित्य नदीच्या पाण्यामध्ये विसर्जन करण्यास सांगितले.

२. संस्कारित साहित्य नदीमध्ये विसर्जन करण्यापूर्वी प्रार्थना म्हणत असल्यापासून पूजासाहित्य नदीत विसर्जन करीपर्यंत ७ तेजस्वी गोल आकाराचे गोळे दिसणे आणि त्या देवता असल्याचे जाणवणे

मी डोळे बंद करून प्रार्थना म्हणत असतांना मला लख्ख प्रकाशरूपी ७ तेजस्वी गोल आकाराचे गोळे दिसले. मी प्रार्थना करून पूजेतील साहित्याचा डबा नदीच्या पाण्यात विसर्जन करीपर्यंत मला ते प्रकाशरूपी गोळे दिसत होते. मी डबा पाण्यात विसर्जन केल्यानंतर मला ते गोळे दिसणे बंद झाले. तेव्हा मला वाटले, ‘प्रत्यक्ष देवताच आल्या असाव्यात.’ त्या वेळी मला पुष्कळ आनंद झाला.

३. योगतज्ञ दादाजींना अनुभूतीविषयी सांगितल्यावर त्यांनी ‘त्या शक्तिदेवता होत्या’, असे सांगणे

संस्कारित साहित्य विसर्जन करून योगतज्ञ दादाजींकडे आल्यानंतर त्यांना मी घडलेला प्रसंग सांगितला. तेव्हा ते मला म्हणाले, ‘‘तू भाग्यवान आहेस. तुला दिसलेले गोळे, म्हणजे शक्तिदेवता होत्या. संस्कारित पूजासाहित्य विसर्जन करायला गेल्यानंतर ‘शक्तीदेवता दिसल्या’, असे आजपर्यंत मला कुणी सांगितले नाही. संस्कारित पूजासाहित्य विसर्जन करत असतांना तेथे सूक्ष्मातून देवता उपस्थित असतात.’’

‘योगतज्ञ दादाजी यांच्या कृपेमुळे मला देवतांचे दर्शन झाले’, त्याबद्दल मला कृतज्ञता वाटली.’

– श्री. अतुल पवार, सनातन आश्रम, रामनाथी, गोवा. (२०.३.२०२५)

पू. शरदकाका यांचा संदेश !

‘प.पू. डॉ. आठवले यांना ८३ व्या जन्मदिवसानिमित्त शुभेच्छा आणि साष्टांग नमस्कार. ‘प.पू. डॉक्टर यांचे आयुरारोग्य चांगले रहावे’, यासाठी योगतज्ञ प.पू. दादाजी यांच्या चरणी प्रार्थना करतो.’

– (पू.) शरद वैशंपायन, कल्याण, जि. ठाणे.

सूक्ष्म : व्यक्तीचे स्थूल म्हणजे प्रत्यक्ष दिसणारे अवयव नाक, कान, डोळे, जीभ आणि त्वचा ही पंचज्ञानेंद्रिये आहेत. ही पंचज्ञानेंद्रिये, मन आणि बुद्धी यांच्या पलीकडील म्हणजे ‘सूक्ष्म’. साधनेत प्रगती केलेल्या काही व्यक्तींना या ‘सूक्ष्म’ संवेदना जाणवतात. या ‘सूक्ष्मा’च्या ज्ञानाविषयी विविध धर्मग्रंथांत उल्लेख आहेत.

सूक्ष्मातील दिसणे, ऐकू येणे इत्यादी (पंच सूक्ष्मज्ञानेंद्रियांनी ज्ञानप्राप्ती होणे) : काही साधकांची अंतर्दृष्टी जागृत होते, म्हणजे त्यांना डोळ्यांना न दिसणारे दिसते, तर काही जणांना सूक्ष्मातील नाद किंवा शब्द ऐकू येतात.