महिला पर्यटकांचे व्हिडिओ काढणार्‍याला अटक

म्हापसा – कळंगुट येथे समुद्रकिनारी महिला पर्यटकांचे अनुमतीविना व्हिडिओ आणि छायाचित्र काढणारा आकाश सरोज (वय ३२ वर्षे, रहाणारा रायबरेली, उत्तरप्रदेश) याला पोलिसांनी कह्यात घेतले आहे. ४ जून या दिवशी दुपारी पर्यटन पोलीस समुद्रकिनार्‍यावर गस्त घालत असतांना आकाश सरोज हा महिलांचे व्हिडिओ काढत असल्याचे त्यांच्या निदर्शनास आले. पोलीस कर्मचार्‍याने संशयिताचा भ्रमणभाष संच पडताळला असता भ्रमणभाष संचामध्ये महिलांचे व्हिडिओ आणि छायाचित्रे आढळून आली. चौकशीच्या वेळी संशयिताने महिलांच्या अनुमतीविना व्हिडिओ काढल्याची स्वीकृती दिली. या घटनेमुळे पर्यटनस्थळी महिलांच्या सुरक्षेचा प्रश्‍न ऐरणीवर आला आहे.