मुंबईच्या किनारपट्टीची सुरक्षा आणि पहारा यांत वाढ !

• भारत-पाकिस्तान युद्ध

• ‘सागरी कवच’ ही व्यापक तटरक्षक मोहीम चालू !

नौदलाच्या परिसरात कुणी आल्यास ‘शूट टू किल’च्या सूचना दिल्या ! – नीतेश राणे, मत्स्यव्यवसाय मंत्री

युद्धाच्या पार्श्‍वभूमीवर मुंबईतील मासेमारांसमवेत नौदलाची महत्त्वाची बैठक घेण्यात आली. त्यात मत्स्यव्यवसाय मंत्री नीतेश राणे यांनी सांगितले, ‘‘नौदल ठिकाणे, तसेच संवेदनशील ठिकाणी मासेमारांना न जाण्याच्या सूचना देण्यात आल्या आहेत. नौदलाने आखून दिलेल्या परिसरात कुणी आल्यास ‘शूट टू किल’च्या (दिसताक्षणीच ठार मारण्याच्या) सूचना देण्यात आल्या आहेत. लवकरच मुंबईतील मासेमार नौकांचे सर्वेक्षण करून एका अ‍ॅपच्या साहाय्यानेे त्यांची माहिती गोळा केली जाणार आहे. पकिस्तानकडून गुजराती मासेमारांच्या काही नौका कह्यात घेण्यात आल्या असून मासेमारांना सोडून नौका जप्त केल्याची माहिती मिळाली आहे. २६ नोव्हेंबर २००८ च्या आक्रमणाप्रमाणे या नौकांचा वापर पाकिस्तानकडून केला जाण्याची शक्यता असल्याने नौदलाने दक्षतेची चेतावणी दिली आहे.’’