कुत्र्यावर आम्ल फेकणार्‍या वृद्धाला १ वर्षाचा कारावास !

नवी देहली – देहलीतील तीस हजारी न्यायालयाने एका कुत्र्यावर आम्ल फेकणार्‍या ७० वर्षीय वृद्ध व्यक्तीला १ वर्षाच्या कारावासाची शिक्षा सुनावली आहे. घटना वर्ष २०२० ची असून यात कुत्र्याचा एक डोळा भाजला होता. शिक्षा सुनावतांना दंडाधिकारी रिचा शर्मा यांनी सांगितले की, ही घटना विवेकाला धक्का देणारी आणि अमानवीय आहे.

न्यायालयाने भा.दं.वि. ४२९ अन्वये १० सहस्र रुपये आणि प्राणी क्रूरता कायद्यांतर्गत ५० सहस्रे रुपये दंडही ठोठावला. दंड न भरल्यास ३ मासांची शिक्षा वाढवली जाईल. १४ मार्च २०२४ या दिवशी आरोपी महेंद्रसिंह याला दोषी ठरवण्यात आले होते. या खटल्यातील सरकारी अधिकार्‍याने दोषीला अधिकाधिक शिक्षा देण्याची मागणी केली होती.