दिवसभरातील महत्वाचे थोडक्यात : नाशिक येथे अवेळी पावसाचा तडाखा, लोकसभा महायुतीचे शिवसेनेचे उमेदवार नरेश म्हस्के यांच्या निवडणूक प्रचारार्थ महाराष्ट्र नवनिर्माण सेनेचे अध्यक्ष राज ठाकरे…

नाशिकला ‘यलो ॲलर्ट’ !

नाशिक – येथे अवेळी पावसाचा तडाखा बसला आहे. जिल्ह्यात अनेक ठिकाणी पिकांची हानी झाली आहे. नाशिकमध्ये ११ मे या दिवशी विजांच्या कडकडाटासह आणि वादळी वार्‍यासह पाऊस आला. पुढील दोन दिवस जिल्ह्याला हवामान विभागाने ‘यलो अलर्ट’ दिला आहे.

१२ मे या दिवशी राज ठाकरे ठाण्यात !

ठाणे – लोकसभा महायुतीचे शिवसेनेचे उमेदवार नरेश म्हस्के यांच्या निवडणूक प्रचारार्थ महाराष्ट्र नवनिर्माण सेनेचे अध्यक्ष राज ठाकरे हे १२ मे या दिवशी ठाण्यात येणार आहेत. या वेळी शिवसेनेचे दिवंगत ठाणे जिल्हाप्रमुख आनंद दिघे यांच्या ‘आनंद आश्रमा’ला ते भेट देणार आहेत.

मे महिन्यापासूनच आंब्याची आवक अल्प

 नवी मुंबई – या वर्षी ऐन मे महिन्यातच आंब्याची आवक घटली आहे. पालटलेल्या हवामानामुळे या वर्षी कोकणातील हापूस आंब्याचा हंगाम लवकर चालू झाला आहे. तो वेळेआधी आटोपत असल्याचे दिसून येत आहे. मे महिन्याच्या आरंभीच आंब्याची आवक अल्प झाली आहे. नेहमीच्या तुलनेत आता बाजारात केवळ ५० टक्के आंबा येत आहे.

सर्व्हर डाऊन झाल्याने सीईटी परीक्षेत गोंधळ !

मुंबई – राज्य सामाईक प्रवेश परीक्षा कक्षाच्या वतीने घेण्यात येणार्‍या एम्.एच्.टी.-सीईटी २०२४ (‘पीसीएम् ग्रुप’) या परीक्षेच्या वेळी बोरिवली येथील आर्.आर्. इन्फोटेक या परीक्षा केंद्रावर अचानक सर्व्हर डाऊन झाला. त्यामुळे परीक्षेसाठी आलेल्या मुलांचा गोंधळ झाला; मात्र ‘सीईटी सेल’ने विद्यार्थ्यांना परीक्षा देण्यासाठी अतिरिक्त कालावधी उपलब्ध केला. यामुळे दुपारच्या सत्रातील या केंद्रावरील परीक्षा पुढे ढकलण्यात आली.

मुलीचा विनयभंग करणार्‍यावर गुन्हा नोंद

कल्याण – येथील एका गृहसंकुलात महेश चव्हाण (वय ३३ वर्षे) याने १३ वर्षांच्या मुलीचा विनयभंग केला. या प्रकरणी त्याच्या विरोधात गुन्हा नोंदवण्यात आला आहे. काहीतरी निमित्त काढून महेश याने तिला बोलण्यात गुंतवले. तिला गृहसंकुलाच्या जिन्यापर्यंत नेऊन तिचा विनयभंग केला.

संपादकीय भूमिका : अशा वासनांधांना कठोर शिक्षा करायला हवी !

मुलीवर लैंगिक अत्याचार करणार्‍या वडिलांना अटक !

नवी मुंबई – दिघा परिसरात रहाणार्‍या १४ वर्षीय मुलीवर तिच्याच वडिलांनी ४ वर्षांपूर्वी लैंगिक अत्याचार केला होता. या प्रकरणी रबाळे पोलिसांनी वडिलांवर बलात्कारासह पोक्सो कलमानुसार गुन्हा नोंदवला असून त्यांना अटक केली आहे.

संपादकीय भूमिका : नैतिकता संपत चालल्याचे दर्शवणारी घटना !