Vote Jihad : भाजपला सत्तेवरून हटवण्यासाठी तुम्हाला ‘व्होट जिहाद’ करावा लागेल ! – समाजवादी पक्षाच्या नेत्या मारिया आलम

फर्रूखाबाद (उत्तरप्रदेश) – ‘भाजपला सत्तेवरून हटवण्यासाठी तुम्हाला ‘व्होेट जिहाद’ करावा लागेल’, असे चिथावणीखोर आवाहन समाजवादी पक्षाच्या नेत्या मारिया आलम यांनी कायमगंज येथील प्रसार सभेत मुसलमानांना केले. ‘व्होेट जिहाद’ या शब्दावरून मारिया आलम यांच्या विरोधात तक्रार करण्यात आल्यानंतर त्यांच्याविरुद्ध गुन्हा नोंदवण्यात आला आहे. मारिया या काँग्रेसचे नेते आणि माजी केंद्रीय मंत्री खुर्शीद आलम यांच्या भाची आहेत. या वेळी खुर्शीद हे मंचावर उपस्थित होते. त्यामुळे खुर्शीद आलम आणि मारिया आलम दोघांवरही भा.दं.वि. कलम १८८ आणि २९५ अ अन्वये गुन्हा नोंदवण्यात आला आहे.

मारिया आलम यांचा सारवासारव करण्याचा प्रयत्न !

मारिया आलम यांनी त्यांच्या भाषणात भाजपला पाठिंबा देणार्‍या मुसलमानांवर  बहिष्कार घालण्याचेही आवाहन केले. गुन्हा नोंद झाल्यानंतर मारिया आलम या स्पष्टीकरण देतांना म्हणाल्या की, मी निवडणुकीच्या प्रचारात होते आणि माझ्या समाजात होते. मतदानाची टक्केवारी अल्प होत आहे. म्हणूनच मी ‘जिहाद’ हा शब्द वापरला. जिहाद म्हणजे संघर्ष. माझ्या बोलण्यातून तुम्ही काय अर्थ काढला ? हे मला ठाऊक नाही.