(म्हणे) ‘खलिस्तानी आतंकवादी गुरपतवंत सिंह पन्नू याच्या हत्येच्या कटामागे ‘रॉ’चा हात !’ -‘वॉशिंग्टन पोस्ट’ वृत्तपत्र

अमेरिकेतील ‘वॉशिंग्टन पोस्ट’ या वृत्तपत्राचा भारतद्वेषी आरोप

वॉशिंग्टन – खलिस्तानी आतंकवादी गुरपतवंत सिंह पन्नू याच्या हत्येचा जो कट रचण्यात आला होता, त्यामागे ‘रॉ’ या भारतीय गुप्तचर यंत्रणेचा हात आहे, असा फुकाचा आरोप अमेरिकेतील ‘वॉशिंग्टन पोस्ट’ या वृत्तपत्राने केला.

‘वॉशिंग्टन पोस्ट’ने त्याच्या एका वृत्तात ‘रॉ’चे अधिकारी विक्रम यादव हे पन्नू याच्या हत्येच्या प्रयत्नात सहभागी असल्याचे म्हटले आहे. यात असाही दावा करण्यात आला आहे की, विक्रम यादव यांनी त्यांच्या प्राथमिक लक्ष्यांच्या सूचीत पन्नूचा समावेश केला होता आणि त्याची हत्या करण्यासाठी नेमबाजांचे पथक निवडले होते. या वृत्तात अज्ञात माजी अमेरिकन अधिकारी आणि भारतीय सुरक्षा अधिकारी यांचा संदर्भ देत दावा करण्यात आला आहे की, यादव यांनी पन्नूची सर्व माहिती त्याच्या न्यूयॉर्कमधील पत्त्यासह मारेकर्‍यांना पाठवली होती.

काय आहे प्रकरण ?

अमेरिकेने गेल्या वर्षाच्या अखेरीस अमेरिकन नागरिक खलिस्तानी आतंकवादी  गुरपतवंत सिंह पन्नू याच्या हत्येच्या कटात भारतीय अधिकारी सहभागी असल्याचा आरोप केला होता. हे सूत्र भारतासमोरही मांडण्यात आले होते. याविषयी अन्वेषण करण्यासाठी भारत सरकारने उच्चस्तरीय समिती स्थापन केली आहे.